عمرڪوٽ ۾ ن ليگ ڪسان ونگ جي اڳواڻ امان الله ٽالپر پاران لال مالهي جي حمايت جو اعلان

جلسي ۾ هزارين ماڻهن جي شرڪت، تيمور ٽالپر پنھنجي ڀاءُ يونس سان سچو ناهي ته عوام سان ڪھڙو سچو ٿيندو: لال مالهي

عمرڪوٽ(ڪانجي مل رکيسر)عمرڪوٽ ويجھو ڳوٺ مورجھنگو ۾ مسلم ليگ نواز جي ڪسان ونگ جي مرڪزي جنرل سيڪريٽري مير امان الله خان ٽالپر ذاتي حيثيت ۾ اين اي 213 تي ضمني چونڊ کان اڳ درياھ بچايو تحريڪ جي گڏيل اميدوار لالچند مالهي جي حمايت جو اعلان ڪري ڇڏيو، مير امان الله ٽالپر پاران ڳوٺ مورجھنگو ۾ ھڪ وڏو جلسو منعقد ڪيو ويو جنھن ۾ اين اي 213 جي اميدوار لالچند مالهي، پي ٽي آئي سنڌ جي اطلاعات سيڪريٽري عالمگير خان، اڳوڻي ايم پي اي ڊاڪٽر دوست محمد ميمڻ سميت پاڪستان تحريڪ انصاف جي عورتن، علائقي واسين، نوجوانن، ٻارن وڏي انگ ۾ شرڪت ڪئي، جلسي کي خطاب ڪندي درياھ بچايو تحريڪ جي اميدوار لالچند مالهي چيو ته تيمور ٽالپر پنھنجي ڀاءُ يونس سان سچو ناهي ته عوام سان ڪھڙو سچو ٿيندو، 18 سالن کان راڄ ڪندڙ ماڻھو 2 سئو ماڻھو گڏ ڪرڻ لاءِ ترسن پيا، مناظري کان ڀڄي ويا، توسان گڏ زرداري ۽ مونسان گڏ عمران خان، شاھ محمود قريشي ۽ پير پاڳاري جھڙيون شخصيتون آھن 17 اپريل جو ڏينھن اوهان جي سياسي خاتمي جو ڏينھن آھي، هن چيو ته پيپلز پارٽي چئي ٿي ته کيس عوام ميڊينٽ ڏنو آھي پر هنن درياھ جو سودو ڪري سنڌ جي 7 ڪروڙ عوام جو معاشي قتل ڪيو آھي، پيپلز پارٽي اميدوار جو پٽ پوليس موبائلن جي پروٽوڪول ۾ ورڪ ڪري ٿو ھاڻ ظلم ۽ ڏاڍ مڙسي جو وقت گذري ويو کيس 17 تاريخ تي عبرتناڪ شڪست ڏينداسين عمرڪوٽ جو باشعور عوام مونسان گڏ آھي، مير امان الله ٽالپر جلسي کي خطاب ڪندي چيو ته ڪجھ به ٿي وڃي پر درياھ تي ڌاڙو ھڻڻ نه ڏينداسين، ھاڻ اها سنڌ ناهي جنھن کي پيپلز پارٽي ٽيڪو لڳائي سمھاريندي هئي، سنڌ سجاڳ ٿي آھي، پاڻي جي کوٽ علائقي کي تباھ ڪيو آھي، اسان سنڌ کي بچائڻ ۽ توهان سنڌ وڪڻڻ وارا آھيو، هن چيو ته نوجوان انقلاب آڻي پيو ۽ عمرڪوٽ جو نوجوان به 17 اپريل تي انقلاب آڻي لال مالهي کي ووٽ ڏئي ڪامياب ڪري پنھنجي شعور جو مظاھرو ڪندو، ان موقعي تي ڊاڪٽر دوست محمد ميمڻ، عالمگير خان، سيد صفدر علي شاھ, فقير محب منڱريو، گل بجير، حاجي ساند، دينار چانڊيو، مير شھزاد ٽالپر، غظنفر ٽالپر، مير بابر ۽ ٻين پڻ خطاب ڪيو.