اصغريه آرگنائيزيشن پاڪستان ۽ اصغريه اسٽوڊنٽس آرگنائيزيشن پاڪستان پاران القدس سيمينار منعقد ڪيو ويو

ڪراچي (رپورٽر) اصغريه آرگنائيزيشن پاڪستان ۽ اصغريه اسٽوڊنٽس آرگنائيزيشن پاڪستان پاران القدس سيمينار شام 4 وڳي دي پيلس بئنڪوئيٽ گلشن حديد فيز ۾ منعقد ڪيو ويو. سيمينار کي ملڪ جي نامور اسڪالرن ۽ ماهرن خطاب ڪيو، جن ۾ ڊاڪٽر زاهد علي زاهدي (ڪراچي يونيورسٽي)، انجنيئر منيب الرحمان (جماعت اسلامي)، ڊاڪٽر صابر ابو مريم (فلسطين فائونڊيشن)، انجنيئر غلام رضا جعفري (اعزازي ميمبر اصغريه ڪائونسل) ۽ برادر ثقلين علي جعفري (صدر اسلامي پاڪستان اسٽوڊنٽس تنظيم) شامل هئا. ڊاڪٽر زاهد علي زاهدي خطاب ڪندي چيو ته فلسطين جو مسئلو رڳو عربن جو نه پر پوري امت مسلمه جو مسئلو آهي، اسان کي قبله اول جي آزادي لاءِ هر ممڪن جدوجهد ڪرڻي پوندي. انجنيئر منيب الرحمان چيو ته مسلمانن کي پنهنجا اختلاف هڪ طرف رکي فلسطيني عوام جي حمايت ۾ متحد ٿيڻ گهرجن. سيمينار کي خطاب ڪندي ڊاڪٽر صابر ابو مريم چيو ته اسرائيلي جارحيت خلاف مزاحمت ئي فلسطين جي آزادي جو واحد رستو آهي، امت مسلمه کي ان مزاحمت جو حصو بڻجڻ گهرجي. ان موقعي تي انجنيئر غلام رضا جعفري چيو ته بيت المقدس امت مسلمه جي دل آهي ۽ اسان ان تي اسرائيلي تسلط کي ڪنهن به صورت ۾ قبول نٿا ڪري سگهون. سيمينار ۾ شرڪت ڪندڙن کي خطاب ڪندي برادر ثقلين علي جعفري چيو ته هاڻي وقت اچي ويو آهي ته اسان پنهنجي مظلوم فلسطيني ڀائرن جي حق ۾ آواز اٿاريون ۽ هر پليٽ فارم تي انهن سان يڪجهتي جو اظهار ڪيون. سيمينار ۾ عورتن ۽ مردن جي وڏي انگ شرڪت ڪئي ۽ فلسطيني عوام سان ڀرپور ايڪي جو اظهار ڪيو. مقررين امت مسلمه کي اپيل ڪئي ته هو قبله اول جي آزادي لاءِ هر ممڪن ڪوشش ڪن ۽ عالمي سطح تي فلسطيني عوام جي حمايت ۾ آواز بلند ڪن.