آصف زرداري ايوان صدر ۾ ويھي پيڪا آرڊيننس تي صحيح ڪري جمھوريت تي وار ڪيو آھي: اياز لطيف پليجو

اياز لطيف پليجي پيڪا ترميمي آرڊيننس کي رد ڪري ڇڏيو

حيدرآباد(بيورو) قومي عوامي تحريڪ جي سربراھ اياز لطيف پليجي پيڪا ترميمي آرڊيننس کي رد ڪندي چيو آھي تہ آصف زرداري ايوان صدر ۾ ويھي پيڪا آرڊيننس تي صحيح ڪري جمھوريت تي وار ڪيو آھي. پيڪا آرڊيننس ڪارو قانون آھي، جيڪو اظهار جي آزادي کي روڪڻ لاءِ آندو ويو آھي. پيپلز پارٽي ۽ ن ليگ جي گڏيل حڪومت بوکلائجي وئي آھي. عوام جي آواز کي دٻائڻ لاءِ سازشون ڪيون پيون وڃن. حڪومت عوام جي تنقيد برداشت نٿي ڪري سگھي. سنڌ ۾ ۽ وفاق کي بدترين حڪمراني آھي. خراب سياسي ۽ معاشي پاليسين جي ڪري ملڪ سنگين بحرانن جو شڪار آھي، جيڪو ماڻهو حڪمرانن جي غلط قدمن ۽ عملن خلاف آواز بلند ڪندو يا اختلاف ڪندو تہ ان آواز کي ھاڻ ڪاري قانون تحت دٻايو ويندو ۽ انتقامي ڪارواين لاءِ استعمال ڪيو ويندو. اسين ان ڪاري قانون کي رد ڪريون ٿا. اياز لطيف پليجي چيو تہ پيپلز پارٽي عوام کي جمھوريت، اٽي، لٽي ۽ اجھي جا ڪوڙا نعرا ھڻي دوکا ڏنا آھن. سنڌ ۾ عوام دشمن معاشي پاليسين جي ڪري ماڻھو اٽي، لٽي ۽ اجھي لاءِ پريشان آھن. گرين پاڪستان بليڪ سنڌ منصوبو آھي، لکين ايڪڙ زمين تي قبضا ڪيا پيا وڃن. جمھوريت ۾ سڀني کي ڳالھائڻ ۽ پنھنجي اظھار جي آزادي ھوندي آھي، پيپلز پارٽي سربراھ پيڪا آرڊيننس آڻي اھو حق ختم ڪيو آھي، جنھن جي جيتري بہ مذمت ڪجي گھٽ آھي.