سنڌ جي وڏن شھرن ۾ لکين غير قانوني افغاني، بنگالي، بھاري ۽ ٻيا پرڏيھي غير قانوني ڪالونيون ٺاھي قبضا ڪري ويٺل آھن: پليجو

اياز لطيف پليجي پاران حيدرآباد ۾ 50سالن کان قائم گهر ڊاهڻ، رهواسين تي فائرنگ ۽ گرفتارين جي مذمت

حيدرآباد(بيورو) قومي عوامي تحريڪ جي سربراھ اياز لطيف پليجي قاسم آباد ۾ واڌو واھ ڀرسان 50 سالن کان قائم گھرن کي حددخليون ڄاڻائي ڊاھڻ، رھواسين جي مٿان فائرنگ، شيلنگ ڪرڻ ۽ گرفتارين جي مذمت ڪندي چيو آھي تہ ڪراچي ۽ حيدرآباد سميت سنڌ جي وڏن شھرن ۾ لکين غير قانوني افغاني، بنگالي، بھاري ۽ ٻيا پرڏيھي غير قانوني ڪالونيون ٺاھي قبضا ڪري ويٺل آھن، سپريم ڪورٽ جي حڪم باوجود انھن غير قانوني پرڏيهين کي نيڪالي نٿي ڏني وڃي ۽ انھن خلاف ڪارروائي ڪرڻ بدران بڻ بجلي، گئس ۽ ٻيون سھولتون ڏئي تحفظ ڏنو ويو آھي پر قاسم آباد ۾ حڪمران طبقي جي بلڊر مافيا کي نوازڻ لاءِ ڌرتي ڌڻين جا گھر ڊاھيا پيا وڃن. اياز لطيف پليجي چيو تہ واڌو واھ ڀرسان غريب ماڻھن جا گھر ڊاھڻ بند ڪيا وڃن. ٿيل نقصان جو ازالو ڪيو وڃي ۽ گرفتار رھواسين کي آزاد ڪيو وڃي. اياز لطيف پليجي چيو تہ پ پ وزير ڪرپشن لاءِ سڄي سنڌ ۾ منشيات فروشن، ڌاڙيلن ۽ بلڊر مافيا جي سرپرستي ڪري رھيا آھن، جنھنڪري عام ماڻھو انصاف کان محروم آھن.