ڪراچي: شاعره ياسمين چانڊيو جي منان شيخ ۽ اشفاق چنڙ سان ملاقات، قومي عوامي تحريڪ ۾ شموليت جو اعلان

اياز لطيف پليجو سنڌ جي مسئلن جي حل لاءِ جاکوڙ ڪري رهيو آهي: ياسمين چانڊيو

ڪراچي (اسٽاف رپورٽر) ڪراچي جي سياسي سماجي اڳواڻ ليکڪ شاعره ياسمين چانڊيو قومي عوامي تحريڪ جي مرڪزي اڳواڻ منان شيخ ۽ قومي عوامي تحريڪ ڪراچي ڊويزن جي صدر اشفاق چنڙ سان ملاقات ڪري پنهنجي نياڻي پرھ سميت قومي عوامي تحريڪ جي سربراھ اياز لطيف پليجو جي قيادت تي اعتماد جو اظهار ڪندي قومي عوامي تحريڪ ۾ شامل ٿيڻ جو اعلان ڪندي چيو تہ آئون ھميشہ پنهنجي وطن، پنهنجي ڌرتي، پاڻي، وسيلن لاء ۽ شهري دهشتگردي جي خلاف جدوجهد ڪندي رهي آهيان، هينئر سنڌ جي سگھاري آواز اياز لطيف پليجي جي قيادت ۾ جدوجهد جي ميدان ۾ هروقت پنهنجو ڀرپور ڪردار نڀائيندس. ياسمين چانڊيو چيو تہ اسان جو عزم آهي تہ پنهنجي ڌرتيءَ جي حقن ۽ خوشحالي لاءِ هڪ بي باڪ ۽ انقلابي جدوجهد کي جاري رکنداسين. هڪ اهڙي تحريڪ جيڪا سنڌ جي مظلوم ۽ حق کان محروم عوام جي آواز بڻجي، انهن جي بنيادي حقن لاءِ جدوجهد ڪري رهي اسان لاءِ هي رڳو شموليت نہ پر هڪ عظيم فرض جي واپسي آهي، جتي اسان پنهنجي ڌرتي، پنهنجي زبان، ۽ پنهنجي ثقافت لاءِ هر محاذ تي مقابلو ڪرڻ لاءِ تيار آهيون. ياسمين چانڊيو چيو تہ اسان پنهنجي ڌرتي جي انهن ماڻهن لاءِ آواز بڻجنداسين، جيڪي صدين کان نظرانداز ڪيا ويا آهن. قومي عوامي تحريڪ ۾ شموليت سان، اسان سنڌ جي عوام لاءِ هڪ نئين سحر جي شروعات جو واعدو ڪريون ٿا. اسان پنهنجي هر جدوجهد ۾ سچائي ۽ خلوص سان اڳتي وڌنداسين.