ٺٽي ۾ اي ڊي سي ون غلام دستگير جي صدارت هيٺ اجلاس ٿي گذريو

شھر ۾ قائم سرڪاري بس ٽرمينل کي فعال بڻائي ٽرانسپورٽرن کي بسون ۽ وينون اُتي ئي بيھارڻ جو پابند بڻايو وڃي: غلام دستگير

ٺٽو( شفيق ڀٽي) ايڊيشنل ڊپٽي ڪمشنر ون غلام دستگير شِيخ جي صدارت ھيٺ ٽرانسپورٽ جي مسئلن بابت شهرين جي شڪايتن جي حل لاءِ دربار ھال مڪلي ۾ اجلاس منعقد ٿيو، جنھن ۾ ايڊيشنل ڊپٽي ڪمشنر ٽو فراز احمد عباسي، سيڪريٽري ريجنل ٽرانسپورٽ اٿارٽي فخرالنساٰء، ڊي ايس پي وحيد لاڙڪ، نيشنل ھاءِ وي اٿارٽي، ڪي ٽي ڊي سي جي عملدارن، ٽرانسورٽرن ۽ شڪايت ڪندڙ شھرين شرڪت. ان موقعي تي ايڊيشنل ڊپٽي ڪمشنر ون غلام دستگير شِيخ سيڪريٽري آر ٽي اي، پوليس ۽ ٻين لاڳاپيل عملدارن کي ھدايت ڪئي تہ ھو شھر ۾ قائم سرڪاري بس ٽرمينل کي فعال بڻائي ٽرانسپورٽرن کي بسون ۽ وينون اُتي ئي بيھارڻ جو پابند بڻائين تہ جيئن شھرين کي پريشاني کان بچائي سگهجي. ھُن کين اھا پڻ ھدايت ڪئي تہ وينن جي فٽنيس، اوور لوڊ سميت گئس سلينڊر وارين مسافر گاڏين خلاف سخت ڪاروائي ڪئي وڃي تہ جيئن ڪنھن بہ امڪاني قيمتي جاني توڙي مالي نقصان کان بچي سگهجي. ھُن چيو تہ ان ڏس ۾ عمل نہ ڪندڙ ٽرانسپورٽرن ۽ گاڏين کي بليڪ لسٽ ڪري سندن روٽ پرمٽ ڪينسل ڪئي وڃي ۽ ٽريفڪ قانون جي پاسداري تي مڪمل عملدرآمد کي يقيني بڻايو وڃي. ھُن چيو تہ پيٽروليم مصنوعات ۾ گهٽتائي باوجود ڪراين ۾ گهنٽائي نہ ڪندڙ ٽرانسپورٽرن خلاف پڻ سخت ڪاروائي ڪئي وڃي تہ جيئن عوام کي رليف فراھم ڪري سگهجي. ايڊيشنل ڊپٽي ڪمشنر ايف ڊبليو او جي عملدارن کي پڻ ھدايت ڪئي تہ ڪراچي ـ ٺٽو ڊبل روڊ جي خراب حصن جي مرمتي ڪم کي جلد مڪمل ڪيو وڃي تہ جيئن گاڏين جي آمدرفت ۾ بھتري سميت حادثن کان پڻ بچي سگهجي. ھُن ٽرانسپورٽرن کي پڻ ھدايت ڪئي تہ ھو بسن، وينن ۽ سوزوڪين کي انتظاميہ پاران مقرر ڪيل ٽرمينلن تي بيھارين، ٻي صورت ۾ خلاف ورزي ڪندڙن خلاف سخت ڪاروائي عمل ۾ آندي ويندي. ان موقعي تي ٽرانسپورٽرن ۽ شڪايت ڪندڙن پاران درپيش مسئلن بابت آگاہ ڪيو ويو، جنھن تي ايڊيشنل ڊپٽي ڪمشنر کين جلد مسئلا حل ڪرڻ جو يقين پڻ ڏياريو.