شڪارپور ۾ عورتن ۽ پٺتي پيل طبقن تي قبائلي ۽ فرقيوارانه تڪرارن جا اثر جي موضوع تي ضلعي اسيمبلي جو اجلاس

شڪارپور ( احسان ابڙو )ڀٽائي سوشل واچ اينڊ ايڊووڪيسي (بسوا)، سنڌ هيومن رائيٽس ڪميشن حڪومت سنڌ ۽ آمريڪن انسٽيٽيوٽ فار پيس پاران جي سھڪار سان ڊپٽي ڪمشنر آفيس شڪارپور ۾ گڏجاڻي.تفصيل موجب اڄ ڀٽائي سوشل واچ اينڊ ايڊووڪيسي (بسوا)، سنڌ هيومن رائيٽس ڪميشن حڪومت سنڌ ۽ آمريڪن انسٽيٽيوٽ فار پيس پاران جي سھڪار سان ڊپٽي ڪمشنر آفيس شڪارپور ۾ عورتن ۽ پٺتي پيل طبقن تي قبائلي ۽ فرقيوارانه تڪرارن جا اثر جي موضوع تي ضلعي اسيمبلي جو اجلاس ٿيو. جنھن جي صدارت ايڊينشل ڊپٽي ڪمشنر ون شڪارپور ظفر عباس عباسي ڪئي جڏھن تہ سنڌ هيومن رائيٽس ڪميشن جو چيئرپرسن اقبال احمد ڏيٿو خاص مھمان ھو. ان موقعي تي ظفر عباس عباسي خطاب ڪندي هن اهم موضوع تي اسيمبلي منعقد ڪرڻ تي بسوا جي ڪوششن کي ساراهيو. هن چيو ته اسيمبلي ڪارائتي ۽ مشاورتي رهي. ھن چيو تہ قبيلائي تڪرارن جي ڪري معيشت، تعليم ۽ صحت جو نقصان ٿي ٿو. ان سلسلي ۾ اثر رسوخ رکڻ وارن ماڻھن کي قبيلائي تڪرار ختم ڪرائڻ ۾ پنھنجو مثبت ڪردار اد ڪرڻ گهرجي ۽ ان کان علاوہ سول سوسائٽي جي پڻ ذميواري آھي تہ امن امان جي قيام ۽ قبيلائي جهيڙن کي ختم ڪرائڻ ۾ پنھنجو ڪليدي ڪردار ادا ڪري. اقبال احمد ڏيٿو چيو تہ سنڌ ھيومن رائيٽس ڪميشن 2013 کان انساني حقن جي تحفظ ۽ پرچار لاءِ مسلسل ڪم ڪري رھي آھي. ھن چيو تہ انساني حقن جي شڪايتن جو ازالو ڪرڻ سنڌ ھيومن رائيٽس ڪميشن جو اجتماعي فرض آهي. سنڌ هيومن رائيٽس ڪميشن مسلسل عوامي سطح تي سيشن منعقد ڪري رهي آهي ته جيئن انساني حقن جي مسئلن کي اجاگر ڪيو وڃي. بسوا جي اڪيڊمڪ ايڊوائزر پروفيسر (ريٽائرڊ) ڊاڪٽر تاج محمد لاشاري اسيمبلي ۾ تجويزون سھڙيندي چيو تہ وقت جي ضرورت آهي ته مقامي سطح تي امن قائم ڪرڻ لاءِ ضلعي امن ڪميٽين کي فعال بڻايو وڃي ڇاڪاڻ جو قبيلائي تڪرارن جي خاتمي ۾ ضلعي امن ڪميٽي جو ڪردار ڪليدي آھي. پوليس ڊيپارٽمنٽ جي پروسيڪيوشن ونگ کي فعال بڻايو وڃي، تعلقي سطح تي امن ميلا منعقد ڪرايا وڃن. يونيورسٽي سطح تي قبائلي تڪرارن جي سببن تي تحقيق ڪئي وڃي. قانون نافذ ڪندڙ ادارن جي وچ ۾ انٽيليجنس شيئرنگ کي فعال ڪيو وڃي. ممنوعہ بور وارن ھٿيارن تي پابندي لاڳو ڪئي وڃي. ڊسٽرڪٽ ڪرمنل ڪوآرڊينيشن ڪميٽي جا اجلاس باقائدگي سان منعقد ڪيا وڃن. ڊويزنل ۽ ضلعي سطح تي فارينزڪ ليب قائم ڪيون وڃن. پوليس ڊيپارٽمنٽ ۾ ڪرائم سين مينجمنٽ سيل قائم ڪيو وڃي. ليگل امپاورمنٽ ڪميٽي کي نوٽيفائي ڪيو وڃي ۽ ان ڪميٽي ۾ سول سوسائٽي کي نمائندگي ڏني وڃي. چائلڊ رائيٽس ڪوآرڊينيشن ڪميٽي کي پڻ فعال ڪيو وڃي. يونين ڪائونسل جي سيڪريٽري کي نڪاح رجسٽرار جو ڊيٽا بيس مرتب ڪرڻ جو پابند ڪيو وڃي. ڄم داخلا جي مرحلي کي موثر بڻايو وڃي. تڪرارن وارن علائقن ۾ بند پيل اسڪول کوليا وڃن. خواجہ سرائن کي 10000 روپيا ماھوار وظيفو ڏنو وڃي ۽ خواجہ سرائن جي رجسٽريشن لاءِ ضلعي سطح تي مرڪز قائم ڪيا وڃن کين تعليم، صحت جون سھولتون مھيا ڪيون وڃن. تعلقي سطح تي معذور ماڻھن لاءِ سينٽر قائم ڪيا وڃن. سول سوسائٽي سپورٽ ڪميٽي تشڪيل ڏني وڃي. ڪارپوريٽ سوشل رسپانسبلٽي (سي ايس آر) فنڊ جو درست نموني سان استعمال ڪيو وڃي. اسيمبلي ۾ گدا حسين بلوچ صدر ڊسٽرڪٽ بار ايسوسيئيشن، محمد پنجل سھتو ڊسٽرڪٽ مينيجر سرسو، ممتاز احمد ڊپٽي ڊائريڪٽر لوڪل گورنمينٽ، ريما ريحان پروونشل ڪوآرڊينيٽر ايس ايس ڊي او،زاھد نون عديل علوي صحافي، ڪاشف صديقي ڪنسلٽنٽ سي ايس او، نور نبي مھر ڊي ايس پي ھيڊڪوآرٽر، شفيق الدين صديقي ڊپٽي ڊائريڪٽر سيوا، رياض احمد سومرو اسسٽنٽ ڊائريڪٽر وومين ڊيولپمنٽ، سردار رام سنگهہ، روي ڪمار، عبدالسميع شيخ، سھيل احمد ٽانوري، جباري نور ٽرانسجينڊر ۽ ٻين خطاب ڪيو. ان کان اڳ خادم حسين ميراڻي ايگزيڪيوٽو ڊائريڪٽر بسوا ضلعي اسيمبلي کي منصوبي ۽ مقصدن بابت آگاهه ڪيو. هن چيو ته بسوا ڪميونٽي جي شموليت ۽ بهتري لاءِ پرعزم آهي. اسيمبلي ۾ اسٽيج سيڪريٽري جا فرائض عبدالجبار خاصخيلي سرانجام ڏنا. اسيمبلي ۾ انساني حقن ۽ سول سوسائٽي جي ڪارڪنن، صحافين، لاڳاپيل سرڪاري ۽ خانگي ادارن جي آفيسرن ۽ شھرين وڏي تعداد ۾ شرڪت ڪئي.