ڊي سي ٺٽو منور عباس سومرو جي صدارت ھيٺ گڏجاڻي ٿي گذري

گڏجاڻي دوران گذريل پوليو مھم جي ڪارڪردگي ۽ اڳڀرائي جو جائزو ورتو ويو

ٺٽو(شفيق ڀٽي) ڊپٽي ڪمشنر منور عباس سومرو جي صدارت ھيٺ گذريل پوليو مھم جي ڪارڪردگي ۽ پيشرفت جو جائزو وٺڻ بابت دربار ھال مڪلي ۾ گڏجاڻي منعقد ٿي، جنھن ۾ اسسٽنٽ ڪمشنر اعجاز علي ھاليپوٽو، ڊسٽرڪٽ ھيلٿ آفيسر ڊاڪٽر صفدر علي شاھ، ڊي ايس پي وحيد لاڙڪ، ايڊيشنل ڊائريڪٽر سوشل ويلفيئر خدا بخش بھراڻي، ڊي اي او سيڪنڊري حضور بخش خاصخيلي، اي ڊي اي او پرائمري محمد حسن سومرو، اين اسٽاپ آفيسر ڊاڪٽر عامر حسين، اميونائزيشن آفيسر ڊبليو ايڇ او ڊاڪٽر لائقہ، ڊسٽرڪٽ مينيجر يونيسيف سجاد حيدر ۽ ٻين لاڳاپيل کاتن جي عمدارن کان علاوہ مرف، پي پي ايڇ آءِ سميت مختلف اين جي اوز جي نمائدن شرڪت ڪئي. گڏجاڻي جي صدارت ڪندي ڊپٽي ڪمشنر منور عباس سومرو چيو تہ پاڙيسري ضلعن ۾ پوليو جا ڪيس ظاھر ٿيڻ باوجود ضلعو ٺٽو پوليو کان پاڪ آھي جنھن جو ڪريڊٽ صحت کاتي سميت سمورن لاڳاپيل ادارن جي عملدارن ۽ پوليو ورڪرن ڏانھن وڃي ٿو جن پنھنجي اڻٿڪ محنت ۽ جدوجهد ڪري ھن ضلعي کي پوليو کان پاڪ رکيو آھي. ھُن گذريل پوليو مھم دوران بھترين ڪارڪردگي تي کين ساراھيندي ايوارڊ ڏيڻ جو اعلان پڻ ڪيو. ڊپٽي ڪمشنر اُميد ڏيکاري تہ آئندہ پوليو مھم دوران پڻ وڌيڪ محنت، سچائي ۽ نيڪ نيتي سان ھر ٻار کي پنھنجو ٻار سمجهي کين پوليو جا ڦڙا پيارڻ ۾ ڪابہ ڪسر نہ ڇڏي ويندي. ھن کين ھدايت ڪئي تہ انڪاري ٻارڙن تي وڌ کان وڌ ڌيان ڏئي ھر صورت ۾ پوليو کان بچاءُ جا ڦڙا پياريا وڃن تہ جيئن کين ھميشہ جي معذوري کان محفوظ بڻائي سگهجي. گڏجاڻي ۾ مهم دوران درپيش چيلنجز تي خيالن جي ڏي وٺ ڪئي وئي ۽ مستقبل لاءِ لائحه عمل جوڙيو ويو.