عمرڪوٽ ڀرسان چاچي هٿان قتل ٿيل 2 معصوم ٻارڙن جي الين اکين سان تدفين

جوابدار سترام ميگهواڙ خلاف سندس ڀاءُ جي فرياد تي ڪيس داخل ڪيو ويو

عمرڪوٽ(رپورٽ:ڪانجي مل رکيسر) عمرڪوٽ ڀرسان بي رحم چاچي ھٿان بيدردي سان قتل ٿيل ٻن معصوم گلڙن جيھڙن ٻارڙن وارو مامرو، مقتول ٻارڙن کي سوين آلين اکين سان مٽي ماءُ حوالي ڪيو ويو، ڳوٺ ۾ سوڳوار ماحول ڇائينل، جوابدار جي ڀاءُ جي فرياد تي ڪيس داخل، گرفتار جوابدار 3 ڏينھن جي رمانڊ تي پوليس حوالي. خبر موجب عمرڪوٽ ڀرسان ڳوٺ راڻا جاگير ۾ بي رحم چاچي سترام ميگھواڙ پاران سندس ٻن گلن جيھڙن ڀائيٽن اڍائي سالا نريندر پٽ راجيش ميگهواڙ ۽ 18 ميهنن جي سندر پٽ جيون ميگهواڙ کي گهران راند ڪرڻ جي بهاني ٻاهر وٺي وڃي ڪهاڙين جا وار ڪري بي دردي سان قتل ڪيل معصوم ٻارڙن سوين آلين اکين سڏڪن سان اباڻي قبرستان ۾ مٽي ماءُ حوالي ڪيو ويو جڏھن ته ڏکويندڙ واقعي تي معصومن جي گھر ۾ روڄ راڙو قھرام متل ھو ۽ ڳوٺ ۾ پڻ سوڳوار ماحول ڇائنجي ويو ۽ ھر اک آلي ھئي ٻي طرف واقعي جو ڪيس راجيش ڪمار پٽ ٻيجل ميگهواڙ جي فرياد تي ظالم چاچا سترام پٽ ٻيجل ميگهواڙ جي مٿان قلم 302 تحت سٽي ٿاڻي عمرڪوٽ تي داخل ڪيو ويو آھي جڏھن ته عمرڪوٽ پوليس گرفتار جوابدار سترام ميگھواڙ کي مقامي عدالت ۾ پيش ڪيو جتي 3 ڏينھن جي رمانڊ تي پوليس حوالي ڪيو ويو آھي رابطو ڪرڻ تي ايس ايڇ او عمرڪوٽ عطا لغاري ٻڌايو ته اسان واقعي جي جوابدار سترام ميگھواڙ کان قتل ڪرڻ ۾ استعمال ٿيل ڪھاڙي ھٿ ڪري جوابدار کي عدالت ۾ پيش ڪيو جنھن کي ٽن ڏينھن جي رمانڊ تي پوليس حوالي ڪيو آھي