نوشهروفيروز جي مختلف شهرن ۾ مڪاني کاتي جي خالي سيٽن تي چونڊ 14 نونمبر تي ٿيندي

ڊسٽرڪٽ مانيٽرنگ آفيسر نوشهروفيروز محمد مستقيم قريشي جي صدارت هيٺ اجلاس ٿيو

نوشهرو فيروز (ڊ ر)ضلعي نوشهرو فيروز ۾ جي تعلقي ڪنڊيارو، محرابپور ۽ ڀريا جي لوڪل گورنمينٽ وارين خالي ٿيل 7 سيٽن تي مڪاني چونڊون 14 نومبر تي منعقد ٿينديون انھي سلسلي ۾ اليڪشن ڪميشن پاران ضابطي اخلاق تي عملدرآمد ڪرائڻ جي سلسلي ۾ چونڊ ۾ حصو وٺندڙ اميدوارن جو ھڪ اجلاس ايڊيشنل ڊپٽي ڪمشنر ٽو ۽ ڊسٽرڪٽ مانيٽرنگ آفيسر نوشهروفيروز محمد مستقيم قريشي جي صدارت ھيٺ ڊي سي آفيس جي ڪميٽي ھال ۾ ٿي گذريو اجلاس ۾ ڊسٽرڪٽ اليڪشن ڪمشنر نوشهروفيروز خالد احمد مرزا، ريٽرننگ آفيسر / اسسٽنٽ ڪمشنر ڪنڊيارو محبت علي، ريٽرننگ آفيسر/ اسسٽنٽ ڪمشنر محرابپور محمد عثمان عارف، ريٽرننگ آفيسر/ اسسٽنٽ ڪمشنر ڀريا شاھد حسين سرڪي تنھي تعلقن جي مانيٽرنگ آفيسرن، پوليس آفيسرن، چونڊن ۾ حصو وٺندڙ اميدوارن ۽ ٻين لاڳاپيل کاتن جي عملدارن شرڪت ڪئي. ان موقعي تي ايڊيشنل ڊپٽي ڪمشنر/ڊسٽرڪٽ مانيٽرنگ آفيسر محمد مستقيم قريشي مڪاني چونڊن ۾ حصو وٺندڙ اميدوارن تي زور ڀريندي چيو ته مڪاني چونڊن کي صاف، شفاف ۽ پرامن بنائڻ لاءِ اليڪشن ڪميشن آف پاڪستان پاران جاري ڪيل ضابطي اخلاق تي هر صورت ۾ عمل کي يقيني بڻايو وڃي ھن وڌيڪ چيو ته صاف ۽ شفاف چونڊون منعقد ڪرائڻ اليڪشن ڪميشن، ضلع انتظاميه، آفيسرن ۽ سياسي جماعتن جي گڏيل ذميواري آهي انهي لاءِ سمورا عملدار ۽ سياسي جماعتن جا اڳواڻ اليڪشن ڪميشن پاران جاري ڪيل ضابطي اخلاق تي عملدرآمد ڪن ڊسٽرڪٽ مانيٽرنگ آفيسر اليڪشن ۾ حصو وٺندڙ اميدوارن تي زور ڀريو ته هو پنهنجي پولنگ ايجنٽن کي پڻ ضابطي اخلاق تي مڪمل عملدرآمد ڪرڻ جو پابند بڻائين هن وڌيڪ چيو ته ضلع انتظاميه پاران مقرر ڪيل پولنگ اسٽيشنن تي سهولتن جي فراهمي لاءِ قدم کنيا ويا آهن ان موقعي تي چونڊن ۾ حصو وٺندڙ اميدوارن پاران پنهنجي خدشن ۽ مسئلن بابت اجلاس کي آگاهي ڏني وئي جنهن تي ڊسٽرڪٽ مانيٽرنگ آفيسر محمد مستقيم قريشي کين يقين ڏياريو ته سندن سمورا خدشا ۽ مسئلا حل ڪرڻ لاءِ هر ممڪن قدم کنيا ويندا.