ملڪ جون حالتون خراب آھن، حڪمران اقتداري مفادن خاطر ملڪ جي بقا داءُ تي لڳائي ڇڏي آھي: اياز لطيف پليجو

آصف زرداري، بلاول ۽ وزيراعظم کان سنڌ جو عوام پڇي ٿو تہ ڇا اسين آفريقي صحرا آھيون

حيدرآباد(بيورو) قومي عوامي تحريڪ جي سربراھ اياز لطيف پليجي چيو تہ ملڪ جون حالتون خراب آھن. حڪمران اقتداري مفادن خاطر ملڪ جي بقا داءُ تي لڳائي ڇڏي آھي اتحادي حڪومت آمريت حڪومتن جو تسلسل ثابت ٿي آھي.اياز لطيف پليجي چيو تہ سنڌ جي 7 ڪروڙ ماڻھن جي بقا ۽ مستقبل جو دارومدار سنڌو درياھ تي آھي. سنڌ جي ماڻھن جو صبر ختم تي رھيو آھي. تمام گھڻي دير نہ ٿي وڃي. آصف زرداري، بلاول ۽ وزيراعظم کان سنڌ جو عوام پڇي ٿو تہ ڇا اسين آفريقي صحرا آھيون. سنڌ حڪومت سنڌ جو پاڻي ۽ وسيلا ڏئي اقتدار خريد ڪيو آھي. پارليامينٽ ۽ سي سي آئي سنڌ جي پاڻي کان لاتعلق بنيل آھن. اياز لطيف پليجي چيو تہ وفاق چيو ھو تہ چشمه، تونسا ڪئنال وغيره ٻوڏ جا واھ آھن پر اھي ڪئنال مستقل وھايا پيا وڃن. سي سي آء ۾ ھڪ صوبي جي اڪثريت آھي. چار ميمبر پنجاب جا آھن. ڪوٽڙي ڊائون اسٽريم ۾ پاڻي ڇوڙ نٿو ڪيو وڃي. بدين، ٺٽو، سجاول ۽ ڊيلٽا سخت متاثر آھن. اياز لطيف پليجي چيو تہ چولستان ڪئنال ٺھيو تہ سنڌ جو پاڻي بند ٿي ويندو. سنڌ بنجر ٿي ويندي. ٺٽو، سجاول، بدين، ڄامشورو ۽ ٿر ۾ پيئڻ جو پاڻي ناھي. سمنڊ لکين ايڪڙ زمين ڳڙڪائي رھيو آھي. اعتراضن باوجود سي ڊي ڊبليو پي تڪراري منصوبن جي منظوري ڇو ڏني. اياز لطيف پليجي چيو تہ ملڪ جي زرعي جي نالي تي سنڌ کي بنجر ۽ ڀڙڀانگ نہ ڪيو. سنڌ ملڪ جي معيشت جو مرڪز آھي، ان جي تباھي ملڪ دشمني آھي. ارسا، واپڊا، سي ڊي ڊبليو پي ۽ سي سي آء مان تعصب پرست ميمبر ھٽايا وڃن. اياز لطيف پليجي چيو تہ سنڌ کي ڀڙڀانگ ڪرڻ تي سنڌ اسيمبلي، ايم پي اي، ايم اين ايز ڇو خاموش آھن. وفاقي ۽ صوبائي حڪمران سنڌ جي عوام جو استحصال بند ڪن. سنڌ جا ماڻھو ھر قيمت تي سنڌ جي پاڻي ۽ وسيلن جو دفاع ڪندا.