ھاري ڪارڊ سياسي مقصدن لاءِ استعمال ڪيا ويندا ۽ لکين ماڻھن کي فقير بڻائي سندن توھين ۽ تذليل ڪئي ويندي: اياز لطيف پليجو

سنڌ حڪومت ھارين کي خيرات بدران بنيادي حق ڏئي، ھارين ۽ مزدورن جي ٻارن کي اسڪالرشپ ڏئي اعلي تعليم جا موقعا ڏنا وڃن

حيدرآباد (بيورو) قومي عوامي تحريڪ جي سربراھ اياز لطيف پليجي چيو آهي تہ ھاري ڪارڊ سياسي مقصدن لاءِ استعمال ڪيا ويندا ۽ لکين ماڻھن کي فقير بنائي انھن جي توھين ۽ تذليل ڪئي ويندي. سنڌ حڪومت ھارين کي خيرات بدران بنيادي حق ڏئي. ھارين ۽ مزدورن جي ٻارن کي اسڪالرشپ ڏئي اعلي تعليم جا موقعا ڏنا وڃن. ھارين ۽ مزدورن کي صحت ڪارڊ ڏئي معياري علاج جون سھولتون ڏنيون وڃن. فصلن جا ھٿرادو اگھ ڪيرائي لکين ھارين ۽ آبادگارن کي بدحال بنائي ڇڏيو آھي. غربت جي شرح وڌي رھي آھي. پيپلز پارٽي حڪومت زراعت جي بحالي نٿي چاھي.اياز لطيف پليجي چيو تہ سنڌ ۾ جيڪي بہ وڏا فصل لھن ٿا انھن جا اگھ ڪيرايا وڃن ٿا. ڪمند، ڦٽيون، ڪڻڪ، ساريون ۽ ٻين فصلن جا اگھ ڪيرايا وڃن ٿا. پاڻي کوٽ جي ڪري لکين ايڪڙ آباد زمين ڀڙڀانگ ٿي آھي. انھي صورتحال جو ازالو ھاري ڪارڊ جاري ڪرڻ سان نٿو ٿي سگھي. سنڌ حڪومت ۽ وفاقي حڪومت جي نااھلي ۽ ناڪامي جي ڪري سنڌ جي آبادگارن ۽ ھارين جو سالانا ڪروڙين ۽ اربين روپين جو نقصان ٿئي ٿو. ھر چوٿين ۽ پنجين سال برساتي ۽ درياھي ٻوڏ جي تباهين بہ وڏو نقصان ڪيو آھي، جنھنڪري لکين ھاري ۽ آبادگار پوئتي ھليا ويا آھن. انھن آبادگارن ۽ ھارين جي بحالي لاءِ کين نقصان جو معاوضو ڏنو وڃي. مفت ٻج، زرعي دوائون ڏنيون وڃي. زرعي اوزار سستا ۽ قسطن تي ڏنا وڃن. بي زمين ھارين ۾ مفت زمين ورھائي وڃي. زرعي سڌارن سان سنڌ ۾ خوشحالي ۽ ترقي ايندي. باقي ھارين کي فقير بنائڻ واريون سازشون بند ڪيون وڃن.