ملير: لطيف ٽائون ۾ عمارت جي ڀِت ڪِرڻ سبب 2 ڄڻا دٻجي فوت، عورت زخمي

اسٽيل مل جو اڳوڻو ميڊيڪل آفيسر ڊاڪٽر رسول بخش ابڙو ۽ اڳوڻو انسپيڪٽر خالد لاشاري فوت

ملير (رپورٽ: عبدالرشيد مورجھريو) قومي شاهراهه لڳ شاهه لطيف ٽائون ۾ نئين تعمير ٿيندڙ عمارت جي ڀت ڪرڻ سبب 2 ڄڻا دٻجي فوت، هڪ عورت سخت زخمي، اطلاع ملندي ئي علائقي واسي ۽ پوليس پهچي وئي، فوتين جي سڃاڻپ سٽي اسپتال جي مالڪ ۽ اسٽيل مل جي اڳوڻو ميڊيڪل آفيسر ڊاڪٽر رسول بخش ابڙو، اڳوڻو انسپيڪٽر خادم لاشاري جڏهن ته زخمي عورت رخسانا طور ٿي آهي، زخمي عورت سميت فوتين کي ضروري ڪارروائي لاءِ جناح اسپتال منتقل ڪيو ويو، علائقي ۾ سوڳ ۽ گهرن ۾ ڪهرام مچي ويو، تفصيل موجب ملير م قومي شاهراهه لڳ شاهه لطيف ٽائون ۾ قائم سٽي جنرل اسپتال کي وڌائڻ واري منصوبي جي نئين ٺهندڙ عمارت جي ڀت اوچتو ڌماڪي سان ڪري پئي جنهن جي نتيجي ۾ اتي موجود سٽي اسپتال جو مالڪ اڳوڻو ميڊيڪل آفيسر اسٽيل مل ڊاڪٽر رسول بخش ابڙو، اڳوڻو انسپيڪٽر خادم حسين لاشاري موقعي تي فوت ٿي ويا، جڏهن ته هڪ عورت رخسانا عارفاڻي، يوسف ۽ هڪ نامعلوم سخت زخمي ٿي پيا جن کي فوري طور تي جناح اسپتال منتقل ڪيو ويو، واقعي جو اطلاع ملندي ئي علائقي واسي ۽ پوليس جي وڏي تعداد م واقعي واري هنڌ پهچي ويا افسوسناڪ واقعي تي علائقي ۾ سوڳ پکڙجي ويو ۽ گهرن ۾ ڪهرام متل آهي