عمرڪوٽ ۾ ڊي سي نويد الرحمان لاڙڪ جي صدارت هيٺ پوليو بابت اجلاس

ضلعي ۾ اڄ کان شروع ٿيندڙ پوليو مهم 28 آڪٽوبر تائين جاري رهندي: نويد الرحمان لاڙڪ

عمرڪوٽ (ڪانجي مل رکيسر) ڊپٽي ڪمشنر عمرڪوٽ نويد الرحمان لاڙڪ جي صدارت هيٺ اڄ ڊپٽي ڪمشنر آفيس ۾ پوليو جي عالمي ڏهاڙي جي حوالي سان تيارين بابت اجلاس منعقد ڪيو ويو، ان موقعي تي ڊپٽي ڪمشنر عمرڪوٽ نويد الرحمان لاڙڪ اجلاس کي خطاب ڪندي چيو تہ ضلعي عمرڪوٽ ۾ 25 آڪٽوبر کان 28 آڪٽوبر 2024 تائين پوليو مهم جاري رهندي، جڏهن تہ پوليو مهم کي سو سيڪڙو ڪامياب بڻايو وڃي .هن چيو ته پوليو ٽيمن جي سيڪيورٽي لاءِ مڪمل انتظام ڪيا ويا آهن ۽ اضافي پوليس اهلڪارن کي مقرر ڪيو ويو آهي ۽ فول پروف سڪيورٽي جا انتظام ڪيا ويا آھن، ان موقعي تي صحت کاتي جي عملدارن ۽ پوليو مهم ۾ فرائض سرانجام ڏيندڙ پوليو ورڪرز کي هدايت ڪئي وئي آهي تہ هو پوليو جا ڦڙا پيارڻ لاءِ مائڪرو پلان تحت پنهنجون سموريون صلاحيتون عمل ۾ آڻين، هن وڌيڪ چيو تہ پوليو جي مرض ۽ ان جي روڪٿام بابت شعور ۽ آگاهي پيدا ڪرڻ وقت جي ضرورت آهي،ان سلسلي ۾ فيلڊ اسٽاف جي تربيت، مضبوط منصوبابندي ۽ حڪمت عملي جي ضرورت آهي، هن چيو تہ ان مهم دوران درپيش سمورين مشڪلاتن ۽ مسئلن کي منهن ڏيڻو پوندو ۽ مسئلن کي حل ڪيو وڃي تہ جيئن اسان جا ايندڙ نسل هن موذي مرض کان نجات حاصل ڪري سگهن، ان موقعي تي پوليو جي فوڪل پرسن ڊاڪٽر وجي ڪمار اجلاس کي 25 آڪٽوبر کان 28 آڪٽوبر تائين شروع ٿيندڙ پوليو مهم جي حوالي سان تفصيلي بريفنگ ڏني. اجلاس کانپوءِ ڊپٽي ڪمشنر عمرڪوٽ نويد الرحمان لاڙڪ جي قيادت ۾ پوليو جي عالمي ڏهاڙي جي مناسبت سان ڊپٽي ڪمشنر آفيس عمرڪوٽ کان پريس ڪلب عمرڪوٽ تائين قومي پوليو مهم جي آگاھي جي حوالي سان ھڪ تمام وڏي واڪ ريلي پڻ ڪڍي وئي ھن آگاھي واڪ ريلي ۾ ايس ايس پي عمرڪوٽ عزيز احمد ميمڻ، اسسٽنٽ ڪمشنر عمرڪوٽ رجب علي سٺيو، اسسٽنٽ ڪمشنر پٿورو ۽ سامارو سنجئہ ڪمار ترڪيو، اسسٽنٽ ڪمشنر ڪنري محمد خان، ڊسٽرڪٽ ھيلٿ آفيسر عمرڪوٽ ڊاڪٽر نندلال، ڊي ايس پيز ، ايم ايس سول اسپتال عمرڪوٽ ڊاڪٽر فريد احمد ھنڱورجو، پوليو فوڪل پرسن ڊاڪٽر وجئہ ڪمار کتري، ڊي ايس پيز، اطلاعات کاتي، پوليس سميت لاڳاپيل کاتي جي عملدارن. مختلف سماجي تنظيمن جي نمائندن ۽ ٻين پڻ شرڪت ڪئي