شڪارپور بچايو تحريڪ پاران بدامني ۽ ٻارڙن جي اغوا خلاف احتجاجي ڪيمپ لڳائي وئي

12ورهين جي عصما ڌيءَ احسان علي راهڙي واري واقعي تي ڌيان ڇڪائڻ ۽ انصاف لاءِ آواز اٿاريو ويو

شڪارپور (احسان ابڙو) شڪارپور بچايو تحريڪ طرفان شھر ۾ وڌندڙ بدامني ۽ معصوم ٻارڙن جي اغوائن خلاف لکيدر گھنٺاگھر چوڪ تي اڄ شام 5 وڳي پرامن احتجاجي علامتي ڪيمپ لڳائي وئي. احتجاجي ڪيمپ ۾ شڪارپور بچايو تحريڪ جي چئيرمين الاھي بخش شيخ، عبدالوهاب ڪاغذي، فضل الله نوراني، عبدالغفور دايو، ۽ علي اصغر پھوڙ ، افضل حسين مغل ، احسان احمد جيھو ، علامہ مولانا عبدالفتاح مھر ، علامه مشتاق احمد سھندڙو پاران شرڪت ڪئي وئي، جڏهن ته وڏي انگ ۾ شھرين ، مغوي ٻارڙن جي وارثن پاران به احتجاج ۾ شرڪت ڪئي وئي احتجاج دوران لکيدر ٿاڻي جي حد ۾ زيادتي بڻيل 12 سالہ معصوم نياڻي عصما ڌيءَ احسان علي راهڙي جي واقعي تي پڻ ڌيان ڇڪائڻ ، انصاف ٿيڻ لاءِ آواز اٿاريو ويو، ۽ جنهن سان مبينه زيادتي ۾ ملوث چئن جوابدارن کي گرفتار ڪري سخت سزا ڏني وڃي پرافسوس جو انصاف جي فراهمي اڃا تائين ممڪن نه ٿي سگهي آهي، ۽ جوابدار اڃا تائين گرفتار نه ٿي سگهيا آهن. متاثر خاندان لاءِ اھو ڏکوئيندڙ صورتحال ناقابل برداشت آهي ۽ انصاف لاءِ هنن پنهنجو احتجاج جاري رکڻ جو عزم ورجايو. شڪارپور بچايو تحريڪ پاران احتجاج جو مقصد شھر ۾ وڌندڙ بدامني، اغوائن، ۽ خاص طور تي ناصر بکراڻي ۽ وليد ميمڻ جي اغوائن تي حڪومت ، وس وارن جو ڌيان ڇڪائڻ ھيو. احتجاج ڪندڙن انتظاميا کان مطالبو ڪيو ته فوري طور تي ضلعي ۾ امن امان جي صورتحال کي بھتر بڻائڻ لاءِ قدم کڻي، معصوم ٻارڙن جي حفاظت کي يقيني بڻائي، ۽ جوابدارن کي سخت کان سخت سزا ڏني وڃي. جڏھن ته احتجاجي مظاهري کي شڪارپور بچايو تحريڪ جي اڳواڻن خطاب ڪندي چيو ته شھر جي عوام لاءِ بدامني ۽ معصوم ٻارڙن جي اغوائن کي برداشت ڪرڻ مشڪل ٿي چڪو آهي. اھا صورتحال شھرين جي ذهني سڪون ۽ زندگيءَ تي ناڪاري اثر وجهي رهي آهي. اڳواڻن انتظاميا کي خبردار ڪيو ته جيڪڏھن انتظاميا ان مسئلي تي فوري طور تي ڪارروائي نه ڪئي ته احتجاجي مظاهرا جاري رکيا ويندا ۽ وڌيڪ احتجاجي مظاهرن جو دائرو وڌائيندي قدم به کنيا ويندا.