اقوام متحدہ جي رپورٽ مان ثابت آھي تہ پاڪستان ۾ حڪمرانن جي ايجنڊا ۾ تعليمي سڌارا ناھن: اياز لطيف پليجو

views | 20th Mar 2024 • سنڌي خبرون

اقوام متحدہ جي رپورٽ مان ثابت آھي تہ پاڪستان ۾ حڪمرانن جي ايجنڊا ۾ تعليمي سڌارا ناھن: اياز لطيف پليجو

حيدرآباد(بيورو) قومي عوامي تحريڪ جي سربراھ اياز لطيف پليجي چيو آھي تہ پاڪستان جي تعليمي نظام بابت اقوام متحده جي رپورٽ تي ڳڻتي جو اظھار ڪندي چيو آھي تہ اقوام متحدہ جي رپورٽ مان ثابت آھي تہ پاڪستان ۾ حڪمرانن جي ايجنڊا ۾ تعليمي سڌارا ناھن. سرمائيدار ۽ جاگيردار طبقي مان ايندڙ حڪمرانن لاءِ اقتدار محض ڪاروبار بنجي ويو آھي. عوام کي جھالت ۾ رکي ووٽ ڏيڻ جي مشين بنايو ويو آھي. ترقي، خوشحالي، تعليم، صحت سميت سموريون سھولتون صرف حڪمران طبقي لاءِ آھن. ڪرپشن ذريعي وسيلن جي لٽمار سبب ملڪي ادارا بي لاڀ ۽ بي فائده ٿي ويو آھي. اياز لطيف پليجي چيو تہ ملڪ جي ٻين صوبن جي ڀيٽ ۾ سنڌ جي تعليم جو ٻيڙو غرق آھي. اسڪولن کي مال جا واڙا ۽ ڀانڊا بنايا ويا آھن. اقوام متحده جي اھا رپورٽ ته 56 لک ٻار اسڪول ئي نٿا وڃن ۽ ھڪ ڪروڙ 4 لک شاگرد سيڪينڊري تعليم کان اڳيان نٿا پڙھي سگھن، اھي انگ بلڪل حقيقت جي عڪاسي آھن. بلڪه صورتحال ان کان به بدتر ھوندي. اياز لطيف پليجي چيو تہ پ پ، ن ليگ ۽ پي ٽي آئي جي جھيڙي ۾ مھانگائي، بيروزگاري، تعليمي تباھي، صحت جي سهولتن جي اڻھوند، بدامني ۽ ٻيا مسئلا مڪمل نظرانداز آھن، جنھنڪري عوام بدتر حالتن جو شڪار آھي. ماڻھو خودڪشيون ڪري رھيا آھن. اياز لطيف پليجي چيو تہ سنڌ ۾ ھٿ وٺي ڌاڙيل راڄ قائم ڪيو ويو آھي. ڪرمپور ۾ بندوق کڻي اسڪول ڊيوٽي تي ويندڙ استاد کي ڌاڙيلن شھيد ڪري ڇڏيو. ڌاڙيل راڄ جي ڪري تعليمي نظام بند ٿي ويو آھي پر سنڌ حڪومت کي ڪو احساس ناھي. ملڪ ۾ ڪٿي بہ ائين ناھي جيئن سنڌ ۾ ٿي رھيو آھي. عالمي ادارا تعليم جي سسلي ۾ جيڪا مدد ڪن ٿا اھا بہ ڪرپشن جي نظر ٿيو وڃي. وفاقي حڪومتن مصلحتن سنڌ کي ڪرپشن جي ڪالوني بنائي ڇڏہو آھي، جنھنڪري نيب يا ايف آئي اي ڪنھن بہ ڪرپشن جي وڏي مڇي کي قانون جي ڄار ۾ ناھي ڦاسايو. اينٽي ڪرپشن کاتو خود ڪرپشن کي ڪينسر ۾ ورتل آھي. اياز لطيف پليجي چيو تہ اسين تعليم کانسواءِ ترقي نٿا ڪري سگھون. تعليم جي بھتري لاءِ سنڌ جي ماڻھن کي پاڻ اڳتي اچڻو هوندو.