اياز لطيف پليجي پاران گاجي کھاوڙ ۾ معصوم ٻارڙِي سان لڄالٽ ۽ قتل جي مذمت

اياز لطيف پليجي پاران گاجي کھاوڙ ۾ معصوم ٻارڙِي سان لڄالٽ ۽ قتل جي مذمت

حيدرآباد(بيورو) قومي عوامي تحريڪ جي سربراھ اياز لطيف پليجي گاجي کھاوڙ مان گم ٿيل ڇھن سالن جي ٻارڙي شبيران کوسو سان لڄالٽ ۽ قتل واقعي جي مذمت ڪندي قاتلن جي گرفتاري جو مطالبو ڪيو آھي. اياز لطيف پليجي چيو تہ معصوم ٻارڙي شبيران کوسو جو قتل ۽ ساڻس لڄالٽ انتھائي وحشت ۽ درندگي جو واقعو آھي. ھن سفاڪ واقعي انسانيت جو ڪنڌ شرم کان جھڪائي ڇڏيو آھي. افسوس جو مقام آھي جو معصوم ٻارڙي 3 ڏينھن کان گم ھئي، جنھن بابت پوليس کي سڀ خبر ھئي پر پوليس ڪو ايڪشن نه ورتو، جنھن ڪري بي رحم واقعو پيش آيو آھي. اياز لطيف پليجي چيو تہ پيپلز پارٽي جي مسلسل چوٿين حڪمراني سنڌ کي المين جي ڌرتي بنائي ڇڏيو آھي. ٿوري ٿوري وقت سان اھڙا درندگي جا واقعا پيش اچن ٿا جو ماڻھن جا لڱ ڪانڊارجو وڃن. سنڌ کي معصوم ٻارن، نياڻين جي مقتل گاھ بنايو ويو آھي. اياز لطيف پليجي چيو تہ پنجاب ۽ خيبر پختونخواھ جي حڪومتن ۾ انتظامي ۽ ترقياتي منصوبن جو مقابلو آھي ۽ سنڌ ۾ ڪرپشن، ڏوھن، اغوائن، ڦرن ۽ ماڻھن کي فقير بنائڻ جو مقابلو ھلي رھيو آھي. امن، ترقي، خوشحالي آڻڻ جھڙو ڪو به منصوبو نظر نٿو اچي. اياز لطيف پليجي چيو تہ حادثن سبب اسپتالن ۾ پھچندڙ زخمين جي علاج جا بندوبست ناھن. سرڪاري اسپتالن ۾ صحت جون بنيادي سھولتون ناھن. روڊ تباھ آھن. مھانگائي ايتري وڌي وئي آھي جو غريب ماڻھو 2 وقت جي ماني لاءِ پريشان آھن. به بجلي، گئس، پئٽرول تمام گھڻا مھانگا آھن، جنھنڪري ھر شئي مھانگي ٿي وئي آھي. حڪومت جي عوام دشمن ڪارڪردگي جي ڪري ملڪ انارڪي طرف ڌڪجي رھيو آھي.