سجاول ۾ ڊي سي عبدالواجد شيخ جي صدارت ھيٺ عام چونڊن بابت اجلاس

سجاول ۾ ڊي سي عبدالواجد شيخ جي صدارت ھيٺ عام چونڊن بابت اجلاس

سجاول(رپورٽر) ڊپٽي ڪمشنر ۽ ضلعي رٽرننگ آفيسر سجاول عبدالواجد شيخ جي صدارت هيٺ عام چونڊن 2024ع جي تيارين جو جائزو وٺڻ لاءِ سندس آفيس ۾ هڪ اهم اجلاس منقعد ٿيو، جنهن ۾ ضلعي اليڪشن ڪمشنر افتخار حسين. ايڊيشنل ڊپٽي ڪمشنر ون عبدالڪريم سنگراسي، ضلعي جي سمورن اسسٽنٽ ڪمشنرن، ايجوڪيشن ورڪس، حيسڪو، پوليس تعليم، صحت ۽ ٻين لاڳاپيل کاتن جي عملدارن شرڪت ڪئي. اجلاس ۾ پولنگ اسٽيشنن ۾ بنيادي سهولتن جي موجودگي، ٽرانسپورٽ، سيڪيورٽي انتظامن، پولنگ اسٽاف جي تربيت، بجلي جي لوڊشيڊنگ ۽ ٻين انتظامي معاملن جو جائزو ورتو ويو. ان موقعي تي ڊپٽي ڪمشنر ۽ ضلعي رٽرننگ آفيسر عبدالواجد شيخ چيو ته اليڪشن ڪميشن جي معاونت سمورن کاتن جي آئيني ۽ قانوني ذميواري ۽ قومي فرض آهي. هن ايجوڪيشن ورڪس ۽ ٻين لاڳاپيل کاتن جي عملدارن کي سختي سان هدايت ڪئي ته سمورين پولنگ اسٽيشنن جي مرمت ۽ بحالي سميت پيئڻ جي پاڻي، بجلي، واش روم، فرنيچر، ريمپ ۽ ٻين گهربل سمورين سهولتن جي موجودگي کي ھر صورت ۾ يقيني بڻائي 25 جنوري 2024ع تائين رپورٽ پيش ڪئي وڃي، ان ڏس ۾ ڪنهن به قسم جي ڪوتاهي برداشت نه ڪئي ويندي. هُن حيسڪو عملدارن کي هدايت ڪئي ته هو پولنگ واري ڏينهن صبح کان 48 ڪلاڪن تائين بجلي جي فراهمي کي بغير ڪنھن رنڊڪ جي يقيني بڻائين. هن پوليس آفيسرن کي هدايت ڪئي ته هو رٽرننگ آفيسرن جي آفيسن، عملي ۽ اليڪشن مٽيريل جي ترسيل سميت سمورين پولنگ اسٽيشنن جي سڪيورٽي لاءِ جٽادار ڪانٽينجنسي پلان تي عملدرآمد کي يقيني بڻائين ته جيئن چونڊ عمل پرامن طريقي سان مڪمل ٿي سگهي.