باقراڻي ويجھو گھران رسي نڪتل نينگري جي وارثن جو احتجاج، سندس اغوا جو شڪ

باقراڻي ويجھو گھران رسي نڪتل نينگري جي وارثن جو احتجاج، سندس اغوا جو شڪ

باقراڻي (رپورٽر) گھران نڪرڻ بعد گم ٿيل نئين گڏ واسي نينگري بيبي رباب شاھ وارو معاملو ” نينگري جي امڙ ۽ ڀاءُ جو پريس ڪلب باقراڻي پھچي احتجاج ، ڳوٺ راوت ابڙو واسي نوجوان چنگچي رڪشا ڊرائيور مٿان نينگري کي اغوا ڪري گم ڪرڻ جو الزام . رپورٽ موجب : باقراڻي تعلقي جي يونيورسٽي ٿاڻي جي حد ڳوٺ نئين گڏ واسي ڏھين درجي جي شاگردياڻي 14 ورھين جي بيبي رباب شاھ ڌي سيد طالب حسين شاھ 6 ڏينهن اڳ مبينا طور گھران ڪاوڙجي نڪرڻ بعد گم ٿي وئي ھئي ، ان سلسلي ۾ سندس امڙ بيبي ريشمان ۽ سندس ڀاءُ سيد پناھ شاھ پريس ڪلب باقراڻي پھچي احتجاج ڪيو ، ان موقعي تي بيبي ريشمان ميڊيا سان ڳالھائيندي چيو ته 6 ڏينهن اڳ منهنجي نياڻي 14 ورھين جي بيبي رباب شاهه گھران ڪاوڙجي ٻاھر نڪتي جنهن بعد ھو گم آهي ، اسان کي شڪ آهي ته ڳوٺ راوت ابڙو واسي جوابدار چنگچي ڊرائيور حفاظت علي عرف ھارون ابڙو کيس پنهنجي چنگچي تي کڻي ويو ۽ کيس اغوا ڪري قيد ڪري ڇڏيو آهي ، ھن چيو ته اسان سيدن سان ظلم ڪيو ويو آهي ، منهنجي نياڻي مون کي واپس ڪرائي وڃي ڪٿي جوابدار کيس جاني نقصان نه پھچائين ، ھوڏانھن گم ٿيل نينگري جي ڀاءُ سيد پناھ شاھ ايس ايس پي لاڙڪاڻي کي جوابدار حفاظت علي ابڙو خلاف درخواست پڻ ڏئي ڇڏي آهي جنهن تي ايس ايس پي لاڙڪاڻي عبدالرحيم شيرازي ڊي ايس پي باقراڻي غلام مصطفي' ابڙو کي اھڙي معاملي جي جاچ جو حڪم پڻ ڏنو آهي ، ان سلسلي ۾ رابطو ڪرڻ تي ڊي ايس پي باقراڻي ٻڌايو ته نينگري يونيورسٽي ٿاڻي جي حد مان گم آهي ، ان لاء نينگري جي وارثن کي يونيورسٽي ٿاڻي تي رپورٽ داخل ڪرائڻ لاءِ چيو آهي ، ھر معاملي جي ھر رخ سان جاچ ڪئي ويندي ، ياد رهي ته ٻه ڏينهن اڳ الزام هيٺ آيل چنگچي ڊرائيور حفاظت علي عرف هارون ابڙو جي وارثن پاران سندس پراسرار نموني گمشدگي خلاف پريس ڪلب باقراڻي اڳيان احتجاج رڪارڊ پڻ ڪرايو ويو هو .