نوشھروفيروز ۾ پ پ جو جلسو، عوام ھڪ ڀيرو ٻيھر اسان تي اعتماد ڪري، آئون وزيراعظم ٿي سندن مسئلا حل ڪندس: بلاول ڀٽو زرداري

334 views | 18th Jan 2024 • سنڌي خبرون

نوشھروفيروز ۾ پ پ جو جلسو، عوام ھڪ ڀيرو ٻيھر اسان تي اعتماد ڪري، آئون وزيراعظم ٿي سندن مسئلا حل ڪندس: بلاول ڀٽو زرداري

نوشهروفيروز (ڊ ر) پ پ جي چيئرمين بلاول ڀٽو زرداري نوشھروفيروز ۾ چونڊ جلسي کي خطاب ڪندي چيو آھي ته عوام پھريان به پ پ اميدوارن کي کٽرايو ھو ۽ ھاڻي به کٽرائيندو. ھن چيو ته مان عوامي مارچ ۾ به نوشھروفيروز مان گذريو ھيس. توھان منھنجو وڏو استقبال ڪيو ھو اھو مون کي ياد آھي. 8 فيبروريءَ تي چونڊون ٿي رھيون آھن ۽ وزير اعظم جو اميدوار آھيان. ھن وقت توھان وٽ آيو آھيان ته منھنجو ساٿ ڏيو، ڇاڪاڻ تي وفاق ۾ پ پ جي حڪومت ٺاهينداسين. ھن چيو ته اسان جو چونڊ عوامي منشور عوامي معاھدو آھي جيڪو ڏھ نڪاتي ايجنڊا آھي. وعدو آھي توھان وزير اعظم بڻايو، مان غربت ۽ بيروزگاري جو خاتمو ڪندس. ھن چيو ته نوشهروفيروز جو قرض آھيان، برسات متاثرين کي وڏو نقصان ٿيو ھاڻي نوشهروفيروز جي عوام جي مدد ڪرڻ آھي. انھن کي گھر ٺاھي ڏيندس. ھن چيو ته جڏھن برسات آئي ۽ ٻوڏ آئي ته مون دنيا جو دورو ڪيو ۽ مان اقوام متحدہ جي سيڪريٽري جنرل کي وٺي آيس. ان اسان جو ساٿ ڏنو ۽ تمام گھڻا گھر سنڌ حڪومت ٺاھيا، اسان حڪومت ۾ ھئاسين ته 20 لک گھر ٺاھڻ شروع ڪري ڇڏيا ھئا ۽ انھن کي مالڪاڻا حق به ڏنا آھن. ھن چيو ته قائد عوام جي وعدي کي پاڙي رھيا آھيون. ٻوڏ سبب پنجاھ سيڪڙو تعليمي ادارا تباھ ٿيا آھن. اليڪشن سبب ترقياتي ڪم نه ٿا ٿي سگھن پر حڪومت ۾ اچي تعليمي ادارا قائم ڪنداسين. ھر ضلع ۾ يونيورسٽيءَ قائم ڪرڻي آھي. نوشهروفيروز ۾ يونيورسٽي ناھي اھا به ڏينداسين. مفت صحت جون سهولتون پهچايون آھن ۽ ھاڻي نوشھروفيروز ۾ اين آئي سي وي ڊي جو يونٽ قائم ڪنداسين ۽ نوشهروفيروز جي عوام کي مفت علاج جون سهولتون ڏينداسين. ھن چيو ته بينظير به غريبن لاءِ ڪم ڪيو ۽ بينظير ايندي روزگار ڏيندي جو نعرو مشھور ٿيو ھو. ھن چيو ته ملڪ ۾ اليڪشن آھي تير ۽ شينھن جو مقابلو آھي توھان صرف تير تي ٺپو ھڻو ۽ پ پ کي وڏي اڪثريت سان ڪاميابي ڪرايو. عوام پل جو ڪردار ادا ڪري توھان کي مدد ڪرڻي آھي سئو سيڪڙو سيٽون پ پ کي کٽرائڻيون آھن. ھن چيو ته اليڪشن کٽي ٽي سئو يونٽ بجلي مفت ڏينداسين ۽ ٽيھ لک گھر ٺاھڻا آھن. ھارين لاءِ انڪم سپورٽ پروگرام ڏينداسين. ھارين کي ڀاڻ جي پريشاني نه ٿيندي. مزدور ڪارڊ ڏينداسين. انھن سمورن مزدورن کي ڪارڊ ڏينداسين. انڪم سپورٽ ۾ اضافو ۽ قرض ڏينداسين. يوٿ ڪارڊ ڏينداسين روزگار ڏينداسين. جلسي کي اڳوڻي صوبائي وزير ضياءَ الحسن لنجار ۽ ضلع جي اميدوارن خطاب ڪيو