اياز لطيف پليجي پاران مختلف علائقن ۾ چونڊ ورڪ جاري، رھواسين پاران شاندار استقبال

اياز لطيف پليجي پاران مختلف علائقن ۾ چونڊ ورڪ جاري، رھواسين پاران شاندار استقبال

حيدرآباد (بيورو) قومي عوامي تحريڪ جي سربراھ اياز لطيف پليجي پي ايس 60 قاسم آباد حيدرآباد جي مختلف ڳوٺن ھٽڙي، ٽنڊو سعيد خان، ڇلگري، ٻڍاڻي،مسوڀرڳڙي واڻڪي وسي، گيلو نوناري، فضل ٻاگھل، رامچند لانڍي، نيو سٽي چوڪ، صالح ٻاگھل ۾ پھتو تہ ڳوٺاڻن گلن جي ورکا ڪري شاندار استقبال ڪيو ۽ کيس سنڌ جي ثقافت اجرڪن، لنگهين، سنڌي ٽوپين جا تعفا ڏنا، اياز لطيف پليجو گهر گهر، دڪانن تي پيادل وڃي اليڪشن ورڪ ڪيو. ڳوٺاڻن اياز لطيف پليجو کي ووٽ ڏيڻ جو يقين ڏياريو. ان موقعي تي گڏ ٿيل ماڻهن جي ميڙ کي خطاب ڪندي اياز لطيف پليجي چيو تہ سنڌ تبديل پئي ٿي سنڌ جو عوام پيپلزپارٽي ۽ زرداري ٽولي مان سخت بيزار آھي.8 فيبروري تي سنڌ تباھ ۽ برباد ڪندڙ پيپلزپارٽي ۽ زرداري ٽولي جي شڪست ٿيندي، خوشحالي، حق، سچ، انصاف، ميرٽ ۽ سنڌ کي تبديل ڪرڻ جي شروعات ٿيندي. اياز لطيف پليجي چيو تہ پيپلزپارٽي بار بار اقتدار اچڻ باوجود سنڌ کي ترقي ڏيڻ بدران تباھي،بربادي کانسواءِ ڪجھ بہ ناھي ڏنو. شھيدن، جمھوريت ۽ اٽي، اجهي ۽ خوشحالي جي نالي ۾ اليڪشن کٽي وري سنڌ جي عوام سان دوکو ڪندي آهي. اياز لطيف پليجي چيو تہ صحيح عوامي سياست سان سنڌ جي حقن جو تحفظ ڪري سگھجي ٿو. بار بار اقتدار ۾ ايندڙ پيپلزپارٽي ۽ زرداري ٽولي جي ڪرپٽ ايم پي ايز، ايم اين ايز، وزيرن ۽ سينيٽرن وٽ سنڌ جي خوشحالي جو ڪو بہ پروگرام ناھي، انھن وٽ ڪرپشن جون اسڪيمون آھن، جيڪو بہ ڪم ڪيو وڃي ٿو، اھو ڪرپشن لاءِ ڪيو وڃي ٿو، جنھنڪري ڳوٺن جا روڊ کنڊر بنيل آھن. سڄو فراڊ جو سسٽم ھلايو پيو وڃي. ان کي حقيقي عوامي ٻڌي سان زرداري ٽولي کي شڪست ڏئي سگھجي ٿي.