ڪراچي ۾ بھار فائونڊيشن ۽ گريوا پاران تعليمي جاڳرتا ريلي ڪڍي وئي

191 views | 08th Jan 2024 • سنڌي خبرون

ڪراچي ۾ بھار فائونڊيشن ۽ گريوا پاران تعليمي جاڳرتا ريلي ڪڍي وئي

گڏاپ(رپورٽر)ڪراچي بھار فائونڊيشن ۽ گريوا پاران سرڪاري اسڪولن ۾ تعليم کي بھتر ڪرڻ ۽ بند اسڪولن کي کولرائڻ لاء جمالي پل سپر ھاء وي کان سنڌ آباد تائين تعليمي جاڳرتا ريلي ڪڍي وئي، تفصيل موجب ڪراچي ۾ بھار فائونڊيشن ۽ گريوا پاران محمد سچل وڌيو. محمد قاسم پٺاڻ. مشتاق احمد اڄڻ. پي ايس 98 جو اميدوار پير فرخ شاھ سرھندي. آپا امير زادي. علي بخش چنه. عاشق وڌيو. ذوالفقار سيال ۽ ٻين جي اڳواڻي ۾ تعليمي جاڳرتا ريلي ڪڍي وئي، ريلي کي خطاب ڪندي اڳواڻن چيو ته سنڌ جي اسڪولن ۾ عمارتن جي مرمت نٿي ڪرائي وڃي. اسڪولن ۾ فرنيچر جي کوٽ آھي جنھن سبب معصوم ٻارڙا پٽ تي ويھي تعليم حاصل ڪري رھيا آھن. سپر ھاء وي ڀرسان ھزارين معصوم ٻارڙا تعليم جي زيور کان محروم بڻيل آهن جن وٽ اسڪول ناھي ھي معصوم ٻارڙا پنڻ ۽ سماجي براين جي ور چڙھيل آھن. ھنن چيو ته سرڪاري اسڪولن ۾ تعليم بھتر نہ ھجڻ ڪري والدين ھن منھگائي جي دور ۾ ڳريون فيسون ادا ڪري پنهنجن ٻارن کي خانگي اسڪولن ۾ تعليم ڏيارڻ تي مجبور آھن. ڪراچي جي مختلف علائقن ۾ سرڪاري اسڪول ناھن ۽ ڪٿي ته استادن جي کوٽ آھي ته ڪٿي عمارتون زبون بڻيل آھن. ھنن چيو ته ھٿ وٺي سنڌ جي تعليم کي تباھ ڪيو پيو وڃي. سرڪاري اسڪولن ۾ مفت درسي ڪتابن سان گڏوگڏ اعليٰ تعليم يافته استادن کي مقرر ڪري روزانو جي بنياد تي چيڪ بيلنس کي برقرار رکيو وڃي. گوسڙو استادن خلاف ڪاروائي ڪئي وڃي ته جيئن سرڪاري اسڪولن جي تعليم بھتر ٿي سگھي. ان لاء والدين، ساڃاهه وندن ۽ سول سوسائٽي کي اڳتي اچي پنھنجو قردار ادا ڪرڻو پوندو. ھنن اعلي اختيارين کان مطالبو ڪيو ته سنڌ ۾ تعليم کي بھتر ڪرڻ لاء بند پيل اسڪولن کي کولرايو وڃي ته جيئن مستقبل جا معمار تعليم حاصل ڪري پنھنجي ملڪ جو نالو روشن ڪري سگھن.