ڪراچي ۾ ٻن ڌرين ۾ جهيڙو، 3 ڄڻا مارجي ويا, ايم ڪيو ايم طرفان پ پ اڳواڻن مٿان ڪارڪنن تي حملي جو الزام

ڪراچي ۾ ٻن ڌرين ۾ جهيڙو، 3 ڄڻا مارجي ويا, ايم ڪيو ايم طرفان پ پ اڳواڻن مٿان ڪارڪنن تي حملي جو الزام

ڪراچي(اسٽاف رپورٽر) ڪراچي ۾ ٻن ڌرين ۾ جهيڙو، 3 ڄڻا مارجي ويا، ايم ڪيو ايم طرفان پ پ اڳواڻن مٿان ڪارڪنن تي حملي جو الزام، ڪياماڙي ضلعي جي مڇر ڪالوني ۾ عمر بن خطاب مسجد وٽ ٻن ڌرين ۾ جهيڙو ٿي پيو، ان دوران فائرنگ ڪئي وئي. ايس ايس پي ڪياماڙي عارف اسلم رائو موجب نثار پٺاڻ ۽ سراج ۾ زمين تان تڪرار هلندڙ هو، ان تڪرار تان جهيڙو ٿي پيو، فائرنگ سبب گوليون لڳڻ جي نتيجي ۾ سراج عرف سراجي ۽ سندس 2 ساٿي مارجي ويا، اطلاع ملندي ئي اي ايس پي ڪياماڙي جي سربراهي ۾ پوليس علائقي جو گهيرو ڪيو، پوليس فائرنگ ۾ ملوث مرڪزي جوابدار نثار پٺاڻ ۽ سندس ڀاءُ کي گرفتار ڪري ورتو، جوابدارن جي قبضي مان هڪ رائفل ۽ هڪ پستول هٿ ڪيو ويو، فائرنگ ۾ ملوث ٻين جوابدارن جي گرفتاري لاءِ ڇاپا هنيا پيا وڃن. لاش پوسٽ مارٽم لاءِ عباسي شهيد اسپتال منتقل ڪيا ويا. ٻئي طرف ايم ڪيو ايم جي ڊپٽي ڪنوينر انيس قائم خاني الزام هنيو آهي ته ايم ڪيو ايم جا نامزد اميدوار همايون عثمان ۽ ملڪ فياض چونڊ مهم ۾ مصروف هئا، پ پ جي دهشتگردن مقامي عهديدارن جي سربراهي ۾ ايم ڪيو ايم جي نامزد اميدوارن تي حملو ڪري ڏنو، جنهن جي نتيجي ۾ 3 ڄڻا مارجي ويا ۽ ايم ڪيو ايم جا ڪارڪن زخمي به ٿيا آهن، حملي جو مرڪزي ڪردار نثار خان قادر پٽيل جو ڪوآرڊينٽر آهي ۽ پ پ جو عهديدار آهي. هوڏانهن پوليس موجب هي سياسي معاملو ناهي، نثار ۽ سراج وچ ۾ ڪافي عرصي کان زمين تان تڪرار هلندڙ هو، ان تڪرار تان جهيڙو ٿي پيو، واقعي جي وڌيڪ جاچ ڪئي پئي وڃي