نوشھروفيروز ۾ ميونسپل چيئرمين مقرر نھ ٿيو، ملازمن جو پگھارن لاءِ احتجاج

قربان علي جي استعيفيٰ ڏيڻ وڃڻ بعد ھن وقت تائين ميونسپل چيئرمين مقرر ناھي ٿيو: ملازم

نوشهرو فيروز (ڊر) ميونسپل ڪميٽي نوشھروفيروز جي چيئرمين پير قربان علي پاران استعيفي بعد ميونسپل جي چارج اڃا تائين ڪنھن کي به نه ملي سگھي آھي. چارج نه ملڻ سبب ميونسپل ڪميٽي جو وھنوار ٺپ ٿي ويو آهي. ميونسپل ملازمن کي ٻن مھينن کان پگھار نه ملي سگھي آھي. پگھار نه ملڻ خلاف ملازم سراپا احتجاج بڻجي ويا آھن. ملازمن ميونسپل ڪميٽي وٽان احتجاجي ريلي ڪڍي وئي. جيڪا پريس ڪلب نوشهروفيروز پھتي جتي ملازم اڳواڻن ڪشن راجا، مولا بخش شيخ، عمران راڄپر ۽ ٻين چيو ته پگھار نه ملڻ ڪري ملازم فاقا ڪشي جو شڪار آھن. ھنن چيو ته چيئرمين جي استعيفي بعد چارج وائيس چيئرمن کي ڏني ويندي آھي پر بلدياتي کاتي جي سيڪريٽري اڃا تائين ڪنھن کي به چارج ناھي ڏني. جنھن ڪري ملازم سخت پريشان آھن. ھنن چيو ته پگھار نه ملي ته پوءِ ڪم ڇڏ هڙتال ڪئي ويندي.