حيدرآباد: قومي عوامي تحريڪ جو سنڌ جي ٻرندڙ مسئلن خلاف 8 آڪٽوبر تي هٽڙي باءِ پاس تي جلسو ٿيندو

سنڌ کي ڪرپشن جي ڪالوني بنايو ويو آھي، قتل جون وارداتون عام ٿي ويون آهن: اياز لطيف پليجو

حيدرآباد: قومي عوامي تحريڪ جي سربراھ اياز لطيف پليجي مھانگائي، ڊجيٽل آدمشماري، بدامني، لاقانونيت، ڌاڙيل راڄ، ڪرپشن، زرعي تباھي، پاڻي تي ڌاڙي ۽ ٻين سنڌ دشمن منصوبن خلاف 8 آڪٽوبر تي حيدرآباد ۾ ھٽڙي باء پاس تي سنڌ بچايو ملڪ بچايو جلسہ عام جو اعلان ڪندي چيو آهي تہ جلسي عام ۾ ھزارين سنڌياڻين سميت لکين ماڻهو شرڪت ڪندا. اياز لطيف پليجي چيو تہ سنڌ کي ڪرپشن جي ڪالوني بنايو ويو آھي. مھانگائي سبب لکين پورھيتن، ھارين ۽ مزدورن جي زندگي بدتر ٿي وئي آھي. صحافين، معصوم ٻارڙن، نوجوانن ۽ نياڻين کي قتل ڪيو پيو وڃي، لاقانونيت ۽ بربريت جو راڄ آھي. سنڌ جا وسيلا تين وال ڪيا پيا وڃن. پيپلز پارٽي جي خراب حڪمراني سبب سنڌ کنڊر ٿي وئي آھي.اياز لطيف پليجي چيو تہ پيپلزپارٽي ۽ زرداري مافيا پنهنجي مسلسل پندرهن سالن جي اقتداري دور دوران سنڌ کي تباهي کان سواءِ ڪجھ نہ ڏنو، اٽي ،اجهي ۽ جمهوريت جي ڪوڙن نعرن ذريعي سنڌ جي عوام سان دوکو ڪيو. تيل، گئس ۽ بجلي پيدا ڪندڙ سنڌ کي مھانگائي ۽ بدحالي جي باھ ۾ اڇلايو ويو آهي. اياز لطيف پليجي چيو تہ قدرتي وسيلن تي ڪمائي جو پھرين حق مالڪ صوبي ۽ انهن علائقن جو آهي،اڪثريت جي نالي ۾ سنڌ تيل، گئس، ڪوئلي ،زمين، پاڻي ۽ ٻين وسيلن کي لٽيو پيو وڃي. سنڌ ۾ سڀ کان وڌيڪ غربت، بيروزگاري، بدحالي، بدامني، لاقانونيت ،ڌاڙيل ڪلچر، قبيلائي دھشتگردي سميت مختلف مسئلن ۾ گھيريل آھي.اياز لطيف پليجي چيو تہ اسان وٽ قدرتي نعمتن باوجود پاڪستان جو ڪروڙين عوام بک، بدحالي ۽ بيروزگاري جو شڪار آھي۔ چند ماڻھن کي دولتمند بنائڻ لاء ڪروڙين عوام کي غربت جي حوالي ڪيو ويو آھي. معاشي پاليسيون مٿين طبقي کي وڌيڪ مضبوط ڪرڻ ۽ ھارين مزدورن ۽ غريب عوام کي وڌيڪ بدحالي جي اونھي کڏ ۾ اڇلائڻ واريون آھن، ملڪ جون پاليسيون جيڪڏھن عوام دوست ۽ غريب دوست ھجن ھا، انھن جي پاليسين ۾ سنڌ جي خوشحالي شامل ھجي ھا تہ اڄ صورتحال بھتر ھجي ھا پر سنڌ ۽ ملڪ تي ڪرپٽ ڦورون ۽ لٽيرن حڪمرانن جو راڄ رھيو آھي، جنھنڪري ماڻھو پنھنجي بنيادي انساني حقن، انصاف، تعليم ۽ صحت کان محروم آھي۔اياز لطيف پليجي چيو تہ 8 آڪٽوبر تي حيدرآباد ۾ ھٽڙي باء پاس تي سنڌ بچايو ملڪ بچايو جلسہ عام ۾ لکين عوام شريڪ ٿي سنڌ سان ٿيندڙ ناانصافين خلاف آواز بلند ڪندو.