اياز لطيف پليجي گھرو صارفين جي بجلي بلن تي 40 سيڪڙو ٽيڪس ۽ بجلي اگهن ۾ واڌ کي رد ڪري ڇڏيو

views | 27th Aug 2023 • سنڌي خبرون

بجلي ھر ماڻھو جي بنيادي ضرورت بڻجي وئي آھي پر بجلي ورھائيندڙ ڪمپنين ۾ جا آفيسر بجلي چوري ڪرائين ٿا: اياز لطيف پليجو

حيدرآباد(بيورو) قومي عوامي تحريڪ جي سربراھ اياز لطيف پليجي یونیفارم، ٽہ ماھي ایڊجسٽمینٽ فیوئل ایڊجسٽمینٽ ٽئرف ايڊجسٽمينٽ ايڊيشنل سرچارجز اليڪٽريسٽي ڊیوٽي، جنرل سیلس ٽيڪس جي نالي سان ناجائز لڳايل گھرو صارفين جي بجلي بلن تي 40 سيڪڙو ٽيڪس ۽ بجلي جي روزانو وڌندڙ قيمتن کي رد ڪندي چيو آھي تہ بجلي ھر ماڻھو جي بنيادي ضرورت بنجي وئي آھي پر بجلي ورھائيندڙ ڪمپنين ۾ ڪرپٽ انتظامي آفيسر ھٿ سان بجلي چوري ڪرائين ٿا. جنھن ڪري عوام ڏانھن ھڪ طرف ڳرا بل اماڻيا وڃن ٿا تہ ٻئي طرف بجلي مھانگي ڪئي وڃي ٿي. اسان وٽ خراب حڪمران ۽ ڪرپٽ انتظامي نظام جي ڪري سڄو نظام درھم برھم آھي. اياز لطيف پليجي چيو تہ بجلي چوري ختم ڪري بجلي ايتري سستي ڪئي وڃي جو ڪنھن کي چوري ڪرڻ جي ضرورت ئي نہ پئي. بجلي چوري ۾ خود بجلي فراھم ڪندڙ ڪمپنين جا ملازم شامل آھن،بجلي بل ذريعي لڳايل سمورا ناجائز اضافي ٽيڪس ختم ڪيو وڃي. اياز لطيف پليجي چيو تہ مھانگائي عوام جي زندگي جھنم بنائي ڇڏي آھي. گئس، بجلي تمام گھڻي مھانگي آھي. زندگي بچائيندڙ دوائن جون قيمتون پئٽرول جا اگھ بي پناھ وڌايا ويا آھن. اٽو ھاري، مزدور ۽ غير ماڻھو جو خريد کان پري ٿو ويو آھي. ڪرپشن جي ڪري ملڪي وسيلن جي لٽمار ٿي آھي. عوام جي دولت تي ڌاڙا ھنيا ويا آھن. خراب حڪمراني جي ڪري خوشحالي ناھي. آيي ايم ايف جي ڊڪٽيشن تي عوام دشمن معاشي پاليسيون جوڙيون ويون آھن. عوام غربت، بدحالي ۽ بيروزگاري جي چڪي ۾ پيسجي رھيو آھي. اياز لطيف پليجي چيو تہ ڪرپٽ حڪمران کرب پتي ٿي ويا ۽ عوام غريب کان غريب ٿي ويو آھي. جاگيردار ۽ سرمائيدار حڪمرانن جي ايجنڊا ۾ عوام جي خوشحالي ۽ ترقي شامل ناھي.