سجاول ضلعي ۾ هلندڙ ترقياتي رٿائون معيار سان گڏ جلد مڪمل ڪيون وڃن: طاهر علي ميمڻ

عوام کي وڌ کان وڌ رليف فراهم ڪرڻ ۽ مسئلا حل ڪرڻ سندس پهرين ترجيح آهي: ڊي سي سجاول

سجاول (رپورٽر) ضلعي ۾ هلندڙ ترقياتي رٿائون معيار سان گڏ جلد مڪمل ڪيون وڃن. طاهر علي ميمڻ ,سجاول ضلعي کي ترقي جي سخت ضرورت آهي. ڊپٽي ڪمشنر طاهر علي ميمڻ چيو آهي ته ضلعي انتظاميه عوام جي ڀلائي لاءِ هر وقت ڪوششون ڪري رهي آهي ته جيئن کين جلد گهربل سهولتون فراهم ڪري سگهجن. هن چيو ته عوام کي وڌ کان وڌ رليف فراهم ڪرڻ ۽ مسئلا حل ڪرڻ سندس پهرين ترجيح آهي. اهڙن خيالن جو اظهار هن آئل ۽ گيس فنڊنگ ۽ سالياني ترقياتي پروگرام تحت ضلعي ۾ ھلندڙ مختلف ترقياتي رٿائن جي دوري دوران ميڊيا جي نمائندن سان ڳالهائيندي ڪيو. ڊپٽي ڪمشنر چيو ته هلندڙ منصوبن جي سار سنڀال ۽ نگراني تمام ضروري آهي ته جيئن طئي ڪيو وڃي ته جن منصوبن لاءِ فنڊز جاري ڪيا ويا آهن انهن تي عملي طور ڪم ٿي رهيو آهي يا نه. هن چيو ته هلندڙ منصوبن جي ناقص ڪارڪردگي بابت انجنيئرن خلاف ڪيتريون ئي شڪايتون مليون آهن، ترقياتي منصوبن جو ڪم ايترو سٺو ناهي جيترو ھئڻ گهرجي، ان ڪري هو پاڻ ضلعي جي هر منصوبي جو دورو ڪري جائزو وٺي رهيو آهي ته جيئن وڌيڪ کان وڌ منصوبا تيزيءَ سان مڪمل ڪري معياري ۽ بهتر ڪم کي به يقيني بڻائي سگهجي. هن چيو ته سجاول ضلعي کي ترقي جي سخت ضرورت آهي، هتي آفيسرن ۽ ملازمن لاءِ آفيسن سميت انفراسٽرڪچر جي کوٽ آهي، جڏهن ته هن سال وڌيڪ ترقياتي منصوبن تي ڪم شروع ڪيو ويندو ته جيئن هتي جا ماڻهو فائدو وٺي سگهن. هن چيو ته رولڙي جو شڪار منصوبن کي هر صورت ۾ مڪمل ڪيو ويندو. ان کان اڳ ڊپٽي ڪمشنر تعلقي جاتي ۾ گورنمينٽ پرائمري اسڪول ھمير اوٺو، تعلقي شاهه بندر ۾ گورنمينٽ بوائز ۽ گرلز سيڪنڊري اسڪول چوهڙ جمالي، اربن واٽر سپلاءِ اسڪيم چوهڙ جمالي ۽ رورل واٽر سپلاءِ اسڪيم شاهه يقيق ۾ جاري ترقياتي منصوبن جو تفصيلي دورو ڪري معائنو ڪيو ۽ لاڳاپيل آفيسرن کي هدايت ڪئي ته هلندڙ منصوبن کي معيار سان گڏ جلد مڪمل ڪيو وڃي، ان سلسلي ۾ ڪنهن به قسم جي ڪوتاهي برداشت نه ڪئي ويندي جڏهن ته ڪم جي معيار تي ڪو به سمجهوتو نه ڪيو ويندو. ان موقعي تي پبلڪ هيلٿ انجنيئرنگ ۽ ايجوڪيشن ورڪس جي انجنيئرن ھلندڙ ترقياتي منصوبن بابت بريفنگ ڏني ۽ سمورن منصوبن کي وقت تي مڪمل ڪرڻ جو يقين پڻ ڏياريو. بعد ۾ ڊپٽي ڪمشنر طاهر علي ميمڻ درگاهه شاهه يقيق تي حاضري ڀري دعا گهري.