سجاول واسين سان ھٿيارن جا لائسنس ٺھرائي ڏيڻ جي آڙ ۾ فراڊ جو انڪشاف

فراڊين پاران هٿيارن جا لائسنس ٺهرائڻ بهاني لکين رپيا هڙپ، شهرين پاران سندن گرفتاري جو مطالبو

سجاول (گلشيرميربحر) سجاول ضلعي جي شهرين سان ھٿيارن جا لائسنس ٺھرائي ڏيڻ جي آڙ ۾ تاريخي فراڊ جو انڪشاف، فراڊين پاران هٿيارن جا لائسنس ٺهرائڻ بهاني لکين رپيا هڙپ، شهرين پاران فراڊين کي گرفتار ڪرڻ جو مطالبو. تفصيل موجب سجاول ضلعي جي شهرين سان ھٿيار ٺھرائي ڏيڻ جي آڙ ۾ تاريخي فراڊ ٿيڻ جو انڪشاف ٿيو آھي، ان سلسلي ۾ مختلف شهرين سيف الله ميمڻ، عمران ميمڻ، مهر علي، احسان ميمڻ، شعيب چانڊيو، رمضان سولنگي، خالد قريشي ۽ ٻين پريس ڪلب دڙو پهچي صحافين اڳيان دانهيندي الزام ھنيو آهي ته ڪراچي سنڌ سيڪريٽريٽ ۾ ملازمت ڪندڙ هڪ فراڊي نالي سجاد علي لکڻ پاران پاڻ کي هوم ڊپارٽمينٽ سنڌ جو ڪلارڪ سڏائي اسان کان في لائسنس جا 60 هزار ورتا ويا آهن، پر ڪافي ڏينهن گذرڻ باوجود اسانکي هٿيارن جا لائسنس نه ملي سگهيا آهن، ڄاڻايل همراه پاران پئسا وٺڻ کانپوءِ اسانجي فون بہ اٽيند نٿو ڪري ۽ اسانجا نمبر بلاڪ ڪري ڇڏيا اٿس، ان سلسلي ۾ جڏهن اسان سنڌ سيڪريٽريٽ مان معلومات ورتي ته خبر پئي ته ڄاڻايل همراه هوم ڊپارٽمينٽ نه پر ڪنهن ٻي ڊپارٽمينٽ ۾ ملازمت ڪندو آهي ۽ ان ڪافي ماڻهن سان اهڙا فراڊ ڪيا آهن. شهرين سنڌ جي وڏي وزير، چيف سيڪريٽري، هوم ڊپارٽمينٽ ۽ ٻين لاڳاپيل اختيارين کان مطالبو ڪيو آهي ته اسان سان جعلسازي ذريعي فراڊ ڪندڙ ڪلارڪ سجاد لکڻ کي گرفتار ڪري ان خلاف سخت ڪارروائي ڪري اسانکي پئسا واپس ڏياريا وڃن.