ڪيٽي بندر ۾ ملاح برادري جو بااثرن ۽ پوليس خلاف احتجاجي مظاهرو

زميندار سعيد ڪلهوڙي مزدوري کان پئسا گهرڻ تي اسان جي 5 ماڻهن کي گرفتار ڪرايو: مظاهرين

ٺٽو (ڊ ر) ڪيٽي بندر جي رھواسي ملاح برادري پاران بااثر ماڻھن توڙي انھن جي ساٿاري بڻيل پوليس جي زيادتين توڙي سندن بيگناھ ماڻھن کي گرفتار ڪري کين حراسان ڪرڻ واري عمل خلاف ڳاڙھو/ڪيٽي بندر روڊ تي سوين ملاح برادري جي ماڻھن عورتن ۽ مردن پنھنجي معصوم ٻارڙن سان گڏ ھڪ احتجاجي مظاھرو محمد حسين ملاح، محمد رمضان ملاح جي اڳواڻي ۾ ڪري ڌرڻو ھڻي روڊ بلاڪ ڪري سخت نعريبازي ڪندي متاثر ملاح برادري جي ماڻھن دانھيندي چيو تہ ھنن مزدوري بااثر زميندار سعيد ڪلهوڙي وٽ ڪئي آھي، جنھن کان مزدوري جا پئسا گھريا تہ ھن اسانکي پئسا ڏيڻ بجاء اسانجي پنجن ماڻهن کي پوليس ھٿان گرفتار ڪرائي اسانکي پوليس پاران حراسان ڪرائي ڪوڙن ڪيسن ۾ ڦاسائڻ جون ڌمڪيون ڏيئي رھيو اھي، جنھن مان کين جاني، مالي نقصان جو خطرو آھي، ھنن ايس ايس پي ٺٽو سميت سمورن وس وارن کان مطالبو ڪيو تہ ساڻن انصاف ڪري بيگناھ گرفتار ڪيل سندن ماڻھن کي پوليس وٽان آزاد ڪرائي کين بااثر زميندار جي زيادتين مان نجات ڏياري سندن ڪيل مزدوري کين ڏياري وڃي، ٻئي طرف ملاح اڳواڻ ڏاڏا آدم گندرو، وڏيرو محمد عرس گندرو، محمد ايوب ملاح، عبدالڪريم الھبخش ميراڻي، شفيع محمد ملاح، اشرف ملاح، محمد خان ملاح، مسڪين جمن ملاح ۽ ٻين پاران ڪيٽي بندر جي ملاحن برادري سان بااثر ماڻھن پاران ڪيل ناانصافين توڙي سندن مانھن کي پوليس ھٿان گرفتار ڪرائي کين پريشان ڪرڻ واري عمل جي سخت لفظن ۾ مذمت ڪندي گھر ڪئي اھي تہ ملاح برادري سان انصاف ڪري ساڻن زيادتيون ڪندِڙ بااثر ماڻھن خلاف سخت ڪاروائي ڪئي وڃي، ٻئي صورت ۾ سخت احتجاج ڪيو ويندو.