28 آئيني ترميم ذريعي تڪراري ڪينالن جي نئين سر تعمير، سنڌ جي وحدت، پاڻي، وسيلن ۽ صوبائي خودمختياري تي حملو ٿيو تہ نتيجو خراب نڪرندو: اياز لطيف پليجو

حيدرآباد(بيورو) قومي عوامي تحريڪ جي سربراھ اياز لطيف پليجي چيو آھي تہ 28 آئيني ترميم ذريعي تڪراري ڪينالن جي ٻيھر نئين سر تعمير، سنڌ جي وحدت، پاڻي، وسيلن ۽ صوبائي خودمختياري تي حملو ٿيو تہ نتيجو خراب نڪرندو. 7 ڪروڙ سنڌي انتھائي سخت مزاحمت ڪندا. اياز لطيف پليجي چيو تہ 26 ۽ 27هين ترميم پاڪستان ۽ سنڌ جي عوام کي تمام گهڻو مايوس ڪيو آهي، 26 ۽ 27هين ترميم ذريعي عدليا، اسيمبلين، اظهار جي آزادي ۽ صوبن کي ڪمزور ڪيو ويو. سنڌ پهرين ئي تباھ لڳي پئي آھي. 28ھين آئيني ترميم ذريعي سنڌ جا باقي رھيل اختيار بہ ختم ڪيا ويندا. پيپلزپارٽي سنڌ وڪڻڻ لاء تيار آھي. وسيلا وڪڻي حڪومت خريد ڪئي وئي آھي. 28 ترميم ۾ سنڌ وفاق وٽ گروي ٿي ويندي، ڪراچي ھليو ويندو، تعليم، صحت، پوليس جا کاتا بہ وفاق حوالي ٿي ويندا. اياز لطيف پليجي چيو تہ سنڌ تي جيڪڏهن ڪنهن حملي ڪرڻ جي ڪوشش ڪئي تہ ڪھڙي بہ ايجنڊا تحت ڪھڙي بہ مقصد تحت تہ پوءِ ياد رکو حڪمرانو! سنڌ ۾ ذاتين، شھرن، جھنڊن، پارٽين جو فرق ڪونہ ھوندو، تڏهن سنڌ ھڪڙي مٺ ھوندي، ھڪڙي تسبيح ھوندي، ھڪڙي للڪار ھوندي، ھڪڙو مضبوط حوصلو ۽ عزم ھوندو. پيپلز پارٽي کي ٻڌايون تہ سڀ ڪجھ اقتدار ناھي. تاريخ مان سبق سکو. ائين نہ ٿئي جو عبرت جو نشان بنجي وڃو. تاريخ ۾ توھان تي فخر بدران شرمندي جو اظھار ڪيو وڃي. اياز لطيف پليجي چيو تہ سنڌ کانسواءِ پاڪستان ناھي. سنڌ خلاف سازشون ملڪ خلاف سازشون آھن. انڪري حڪمران ھوش کان ڪم وٺن، ملڪ خلاف سازشون بند ڪيون وڃن.