گڏاپ پوليس هٿان مبينا مقابلي ۾ مارجي ويل آصف خان جي وارثن جو ڌرڻو

مارجي ويل آصف خان جي وارثن سندس لاش سپر هاءِ وي تي رکي ڌرڻو هنيو، ٽريفڪ معطل

ملير (رپورٽ: عبدالرشيد مورجھريو) گڏاپ سٽي پوليس جي مبينا مقابلي ۾ مارجي ويل آصف خان نالي شهري جي واقعي بعد علائقي ۾ سخت احتجاج شروع ٿي ويو آهي. وارثن ۽ علائقي واسين الزام هنيو آهي ته مقابلو جعلي هو ۽ آصف کي گهر مان گرفتار ڪري بعد ۾ فائرنگ ڪري قتل ڪيو ويو.وارثن جو چوڻ آهي ته پوليس آصف کي ماڻهن جي سامهون گرفتار ڪيو ۽ پوءِ جعلي مقابلي جو ڊرامو رچائي کيس ماريو ويو. واقعي خلاف خلجي ڳوٺ ۾ سوين ماڻهو گڏ ٿي ويا ۽ بعد ۾ لاش سپر هاءِ وي تي رکي ڌرڻو هنيو ويو.ڌرڻي سبب سپر هاءِ وي مڪمل طور بند ٿي وئي، جنهن سبب ٽريفڪ جي رواني سخت متاثر ٿي ۽ مسافرن کي مشڪلاتن جو منهن ڏسڻو پيو.پوليس موجب واقعي کان پوءِ ايس ايڇ او ٿاڻو گڊاپ کي معطل ڪيو ويو آهي، پر وارثن جو چوڻ آهي ته رڳو معطلي ڪافي ناهي. انهن مطالبو ڪيو آهي ته واقعي جو ڪيس داخل ڪري شفاف جاچ ڪئي وڃي ۽ ذميوارن کي گرفتار ڪيو وڃي.واقعي واري هنڌ تي پوليس جي وڏي نفري موجود آهي ۽ صورتحال تاحال ڳنڀير آهي، جڏهن ته ڌرڻو ختم ڪرائڻ لاءِ ڳالهيون جاري آهن۔