سھراب ڳوٺ ۾ 12 کان 16 ڪلاڪ جي لوڊشيڊنگ سبب رهواسي عذاب ۾ مبتلا

علائقي واسين جي لوڊ شيڊنگ ڪري بجلي مال منڊي ۽ فيڪٽرين کي مبينا وڪرو ڪرڻ جو انڪشاف

ملير (رپورٽ: عبدالرشيد مورجھريو) روشنين جي شھر ڪراچي جي سھراب ڳوٺ ٽائون جي مختلف علائقن ۾ ڪي اليڪٽرڪ پاران روزانو جي بنياد تي 12 کان 16 ڪلاڪ جي ڊگھي لوڊ شيڊنگ ڪئي پئي وڃي، تازو بجلي جي وزير مملڪت اويس لغاري اھو اعلان پڻ ڪيو ھو ته ملڪ ۾ لوڊشيڊنگ ختم ڪئي وئي آھي، تنھنجي باوجود به ڪراچي اليڪٽرڪ سپلائي ڪارپوريشن پاران لوڊشيڊنگ جون قھري ڪاروايون جاري آھن.علائقي واسين جي شڪايتن تي ميڊيا جي ٽيم مختلف علائقن جو دورو ڪري ماڻھن کان حال احوال ورتا، نالا ظاھر نہ ڪرڻ جي شرط تي علائقي واسين پنھنجا ويچار ونڊيندي چيو ته ڪي اليڪٽرڪ وارن اسانجي زندگي زھر بڻائي ڇڏي آھي، سڄو سڄو ڏينھن پوري پوري رات لائيٽ نه ٿي ڏني وڃي، اليڪٽرڪ سان وابسته سمورو ڪاروبار ٺپ ٿي ويو آھي، اسان کان ٻن ويلھن جي ماني به کسي پئي وڃي، روز بروز مھانگائي اسان جو جيئڻ جنجال ڪري ڇڏيو آھي مٿان لائيٽ جي ڊگھي لوڊشيڊنگ ويتر اسان کي خودڪشين ڏانھن ڌڪي رھي آھي، قيامت جهڙي گرمي ۽ مٿان مسلسل 12 کان 16 ڪلاڪ بجلي جي نه ھجڻ ڪري گهرن ۾ پاڻي ناهي، ٻار، عورتون، بزرگ ۽ بيمار ماڻهو تڪليف واري زندگي گذارڻ تي مجبور آهن، ڪراچي سميت پوري ملڪ ۾ گرمي ۽ ھيٽ ويو ايمرجنسي لڳل اھي، تيز گرمي جي ڪري مختلف بيمارين منھن ڪڍيو آھي، ھڪ طرف بجلي نہ ھجڻ جو جواز ڄاڻايو پيو وڃي ٻئي طرف انھن ئي علائقن ۾ ڪي اليڪٽرڪ جي پرائيويٽ ماڻھن طرفان ڪنڍا ڪنيڪشن ذريعي 24 ڪلاڪ بغير ڪنھن وقفي جي بجلي ڏني پئي وڃي، اھو بہ انڪشاف ٿيو آھي ته 24 ڪلاڪ بجلي جا ريٽ به مقرر ٿيل آھن، اعتبار ذريعن ڄاڻايو آھي ته ڪي اليڪٽرڪ ۽ ڪنڍا مافيا، ميٽر صارفين لاء اھڙيون حالتون پيدا ڪري رھيا آھن ته جيئن اهي به 24 ڪلاڪ هلندڙ لائيٽ واري لائين تي ڪنڍا ڪنيڪشن لڳرائين ۽ آرام سان بجلي استعمال ڪن، هر مهيني ڪي اليڪٽرڪ جو عملو ۽ ڪنڍا مافيا پنهنجي ئي اداري کي ڪروڙن رپين جو نقصان ڏئي رهيا آهن، رهواسين جو اھو به چوڻ آھي ته اهو ممڪن ناهي ته ڪي اليڪٽرڪ جي آفيسرن جي آشيرواد کان سواءِ هر مهيني پنهنجي ئي اداري کي ڪروڙن رپين جو چُونو لڳايو وڃي، ڪي اليڪٽرڪ جي ستايل عوام اهو به انڪشاف ڪيو آهي ۽ الزام پڻ لڳايو آھي ته اسان جي علائقن جي حصي جي بجلي نادرن باءِ پاس تي قائم مال منڊي ۽ فئڪٽرين کي مبينا وڪرو ڪئي پئي وڃي، جنهن مان ھر مھيني لکين رپيا ڪنڍا مافيا، ڪي اليڪٽرڪ جي عملي ۽ سندن اعلي آفيسرن جي کيسي ۾ وڃن ٿا، ھتان جي رهواسين سنڌ هاءِ ڪورٽ جي چيف جسٽس، وفاقي وزارت بجلي اويس لغاري، وزيراعلي سنڌ مراد علي شاہ، گورنر سنڌ سيد نھال ھاشمي ۽ اعلي اختيارين کان اپيل ڪئي آھي ته ھن عمل خلاف نوٽيس وٺي ڪي اليڪٽرڪ ۽ ڪنڍا مافيا خلاف ڪارروائي ڪري عوام کي جيئڻ جو حق ڏنو وڃي، ٻي صورت ۾ علائقي واسي پرامن احتجاج جو حق محفوظ رکن ٿا جيڪو انھن جو قانوني ۽ آئيني حق آھي.