ملير: سپر هاءِ وي ڀرسان سوئمنگ پول ۾ ٻڏڻ سبب 4 ورهين جي نينگري فوت

ملير (رپورٽ: عبدالرشيد مورجھريو)سپر هاءِ وي تي گڏاپ روڊ ڀرسان قائم هڪ سوئمنگ پول ۾ وهنجڻ دوران پاڻي ۾ ٻڏي وڃڻ سبب 4 ورهين جي نينگري فوت ٿي وئي ريسڪيو ذريعن موجب نينگري کي ڳڻتي جوڳي حالت ۾ فوري طور فاطمه بقائي اسپتال ٽول پلازه منتقل ڪيو ويوجتي ڊاڪٽرن سندس معائني کان پوءِ فوت ٿيڻ جي تصديق ڪئي فوت ٿيل نينگري جي سڃاڻپ حسبه ڌيءَ يوسف، عمر 4 سال، طور ٿي آهي واقعي جي اطلاع تي گڊاپ سٽي ٿاڻي جي پوليس اسپتال پهچي ضروري قانوني ڪارروائي شروع ڪري ڇڏي. پوليس موجب ابتدائي ڄاڻ موجب نينگري سوئمنگ پول ۾ وهنجڻ دوران اوچتو گهري پاڻي ۾ هلي وئي، جنهن سبب هوءَ ٻڏي فوت ٿي. جڏهن ته واقعي جي وڌيڪ جاچ جاري آهي ته جيئن حادثي جا سمورا ڪارڻ معلوم ڪري سگهجن قانوني ڪارروائي مڪمل ٿيڻ کان پوءِ نينگري جو لاش وارثن حوالي ڪيو ويندو. پوليس ۽ ريسڪيو اختيارين والدين کي اپيل ڪئي آهي ته هو ٻارن کي سوئمنگ پولن، تلائن ۽ ٻين آبي هنڌن تي هرگز اڪيلو نه ڇڏين ۽ هر وقت سندن ويجهي نگراني ڪن، جيئن اهڙن افسوسناڪ واقعن کان بچي سگهجي.