چمبڙ ويجهو ڳوٺ قادر بخش موري ۾ جهيڙي دوران هڪ ڄڻو قتل، ٻيو زخمي

ڪهاڙي لڳڻ سبب 50 ورهين جو الهه بخش پنهور زخمي ٿيڻ بعد حيدرآباد جي اسپتال ۾ دم ڏئي ڇڏيو

چمبڙ (رپورٽر) چمبڙ ويجهو ڳوٺ قادر بخش موري ۾ ملاح ۽ پنهور برادرين وچ ۾ جهيڙو، هڪ ڄڻو قتل، هڪ سخت زخمي. جهيڙي دوران 50 ورهين جو الهبخش پنهور ڪھاڙي لڳڻ سبب سخت زخمي ٿيو، جنهن کي ڳڻتي جوڳي حالت ۾ حيدرآباد منتقل ڪيو ويو، جتي هو زخمن جا سور نه سهندي فوت ٿي ويو. ذريعن جو چوڻ هو ته ڪجھ سال اڳ طاهر پنهور ملاح برادري جي هڪ ڇوڪري سان پسند جي شادي ڪئي هئي، جنهن تان تڪرار هلندڙ هو. مقامي ماڻهن جو چوڻ آهي ته انهي پسمنظر ۾ ملاح برادري جي ماڻهن پنهورن جي گهرن تي حملو ڪيو..واقعي ۾ طاهر پنهور پڻ سخت زخمي ٿيو آهي، جيڪو سول اسپتال حيدرآباد ۾ علاج هيٺ آهي.ٻئي طرف پوليس ڪارروائي ڪندي ملاح برادري سان تعلق رکندڙ ٽن ڄڻن کي گرفتار ڪري ورتو آهي، جڏهن ته واقعي بابت وڌيڪ جاچ جاري آهي.