نوشھروفيروز ۾ جونيئر سائنس ٽيچر جي ٽيسٽ پاس ڪندڙ اميدوارن جو احتجاج

نوشھروفيروز (ڊ ر) جونيئر سائنس ٽيچر جا ٽيسٽ پاس اميدوارن جو آرڊر جاري نه ٿيڻ خلاف احتجاج, نوشھروفيروز ۾ جونيئر سائنس ٽيچر جي ڀرتين لاءِ ٽيسٽ پاس ڪندڙ نوجوانن پاران مقرري جا آرڊر جاري نه ٿيڻ خلاف ضلعي تعليم آفيس ۽ پريس ڪلب آڏو احتجاجي مظاهرو ڪيو ويو۔ مظاهرين هٿن ۾ پلي ڪارڊ کڻي نعريبازي ڪئي ۽ حڪومت کان فوري طور تي مقرري جا آرڊر جاري ڪرڻ جو مطالبو ڪيو۔ ان موقعي تي موج علي جتوئي ۽ مهتاب خاصخيلي ميڊيا سان ڳالهائيندي چيو ته هنن جونيئر سائنس ٽيچر جي ڀرتي لاءِ گهربل ٽيسٽ ڪاميابي سان پاس ڪئي آهي، جڏهن ته تعليم کاتي ۾ جونيئر سائنس ٽيچرن جون ڪيتريون ئي جايون خالي پيل آهن، پر ان جي باوجود ٽيسٽ پاس اميدوارن کي مقرري جا آرڊر جاري ناهن ڪيا پيا وڃن۔ هنن چيو ته ڊگهي انتظار سبب نوجوانن ۾ سخت مايوسي ۽ بيچيني پيدا ٿي رهي آهي، جڏهن ته سندن مستقبل پڻ داءَ تي لڳل آهي۔ ان موقعي تي ملڪ صفدر اعواڻ چيو ته ٽيسٽ پاس ڪندڙ نوجوانن کي فوري طور نوڪريون فراهم ڪري سندن مستقبل بچايو وڃي۔ هن مطالبو ڪيو ته تعليم کاتو ميرٽ تي ڪامياب ٿيندڙ اميدوارن کي بنا دير مقرري جا آرڊر جاري ڪري۔ مظاهرين خبردار ڪيو ته جيڪڏهن سندن جائز مطالبن تي عمل نه ڪيو ويو ته احتجاج جو دائرو وڌيڪ وڌايو ويندو۔