حيدرآباد ۾ اغوا ڄاڻايل ناري جي جي وارثن جو الزام هيٺ آيل نوجوان تي گهر تي مبينا حملو

حنا جي ماءُ شبانه، عاليان ۽ ٻين رات جو گهر تي حملو ڪري ڀڃ ڊاهه ڪئي ۽ ڌمڪيون ڏنيون: اسد شاهه جا وارث

حيدرآباد (بيورو) حيدرآباد ۾ اغوا ڄاڻايل ناري حنا برهماڻي جي وارثن جو نوجوان اسد شاهه جي گهر تي مبينا حملو، ڀڃ ڊهه، گهرڀاتين کي ڌمڪيون ڏئي فرار ٿي ويا، ٽنڊو يوسف ٿاڻي جي حد گلشن خير محمد واري علائقي مان نوجوان اسد شاهه ۽ ناري حنا برهماڻي جي پراسرار نموني گم ٿيڻ واري معاملي تان ڌرين ۾ ڇڪتاڻ تيز ٿي وئي. نوجوان اسد شاهه جي گهر ڀاتين جو چوڻ آهي ته حنا جي گهرڀاتين اغوا جو ڪيس داخل ڪرائي اسد جي پيُ ڪمال شاهه کي بيگناهه گرفتار ڪرايو آهي، معاملي پوليس جاچ هيٺ هجڻ باوجود ناري جا گهرڀاتي هاڻي غيرقانوني حربا استعمال ڪرڻ تي لهي آيا آهن، هو ملڪيت تي قبضو ڪرڻ چاهين ٿا. نوجوان جي گهرڀاتين موجب حنا جي ماءُ شبانه، عاليان ۽ ٻين رات جو سندن گهر تي حملو ڪري ڀڃ ڊاهه ڪئي ۽ موتمار ڌمڪيون ڏنيون، جنهن دوران اسد جي دل ۽ شگر جي مريض پيرسن امڙ جي طبيعت خراب ٿي وئي، کيس ڪجهه به ٿيو ته ذميوار حنا جا گهرڀاتي هوندا. هنن ڊي آئي جي ۽ ايس ايس پي حيدرآباد کان مطالبو ڪيو ته سندن گهر تي حملو ڪري قانون جا بکيا اڊيريندڙ جوابدارن خلاف قانوني ڪاروائي ڪئي وڃي