ٺٽو: ڳوٺ محمد حسن شيخ جي متاثرن ۾ سامان ورهايو ويو

هلال احمر ٺٽي جي چيئرمين محمد حنيف ميمڻ پاران سامان ورهايو ويو

ٺٽو( رپورٽ شفيق ڀٽي) ڳوٺ محمد حسن شيخ جي متاثرن ۾ هلال احمر پاڪستان ٺٽو جي چيئرمين حاجي محمد حنيف ميمڻ پاران امدادي سامان ورهايو ويو.غلام الله ۽ بلوسر ڪالوني جي وچ ۾ واقع ڳوٺ محمد حسن شيخ ۾ گذريل مهيني باهه لڳڻ سبب 20 گهر سڙي رک ٿي ويا هئا، جنهن ڪري گهرن ۾ پيل لکين رپين جو سامان تباهه ٿي ويو ۽ ڪيترائي جانور پڻ مري ويا هئا. باهه لڳڻ سبب جاني نقصان ته نه ٿيو، پر مالي نقصان تمام گهڻو ٿيو هو.سرڪاري امداد نه ملڻ سبب هلال احمر پاڪستان ٺٽو جي چيئرمين حاجي محمد حنيف ميمڻ پنهنجي مدد پاڻ تحت ۽ ڪجهه مخير حضرات جي سهڪار سان مذڪوره ڳوٺ ۾ ڊوگرا ڪچا گهر تعمير ڪرائي ڏنا، جڏهن ته روزمرهه جي ضرورتن جو سامان پڻ پنهنجي هٿن سان متاثرن ۾ ورهايو. ان سامان ۾ ڪپڙا، ٿانوَ، لحاف، ڪمبل، مڇردانيون ۽ ٻيون ضروري شيون شامل هيون.ان موقعي تي ميڊيا سان ڳالهائيندي حاجي محمد حنيف ميمڻ چيو ته اسان جي هميشه ڪوشش هوندي آهي ته جتي به اهڙو ڪو حادثو پيش اچي، اتي فوري طور مدد لاءِ پهچون. هن سال سئو کان وڌيڪ ڳوٺن ۾ اتفاقي باهه لڳڻ جا واقعا پيش آيا، جتي اسان متاثرن جي ڀرپور مدد ڪئي آهي، ۽ اهو سلسلو مستقبل ۾ به جاري رهندو.ڳوٺ جي متاثرن حاجي محمد حنيف ميمڻ جو دل جي گهراين سان شڪريو ادا ڪندي چيو ته هنن بروقت پهچي سندن مدد ڪئي، جنهن سان کين وڏي سهائتا ملي.