عمرڪوٽ: نينگري سان مبينا نازيبا حرڪتن وارو مامرو، جوابدار عدالت ۾ پيش

عدالت جوابدار کي وڌيڪ جاچ جي لاءِ ٽن ڏينهن جي جسماني رمانڊ تي پوليس حوالي ڪيو

عمرڪوٽ (رپورٽ:ڪانجي مل رکيسر) گهٽ عمر گهرو ملازم نينگري سان مبينا غير اخلاقي ۽ نازيبا حرڪتن جي الزام هيٺ گرفتار ٽيوشن سينٽر جي مالڪ ممتاز ڀٽي کي مقامي عدالت ۾ پيش ڪيو ويو، سول جج ۽ جوڊيشل مئجسٽريٽ ون ابتدائي ٻڌڻي کان پوءِ وڌيڪَ جاچ لاءِ جوابدار کي ٽن ڏينهن جي جسماني ريمانڊ تي پوليس حوالي ڪرڻ جو حڪم جاري ڪري ڇڏيو، پوليس موجب جوابدار خلاف ڪارروائي ان وقت عمل ۾ آندي وئي جڏهن مبينا طور نينگري سان غير اخلاقي حرڪتن جي هڪ وڊيو سوشل ميڊيا تي وائرل ٿي وئي، جنهن بعد سڄي شهر ۾ ڳڻتي ۽ تشويش جي لهر پکڙجي وئي، متاثر نينگري جي ڀاءُ معشوق کوسو جي فرياد تي وومين ٿاڻي عمرڪوٽ ۾ ڪيس داخل ڪيو ويو، جنهن بعد پوليس جوابدار کي گرفتار ڪري قانوني ڪارروائي جو آغاز ڪيو، ذريعن موجب ممتاز ڀٽي سوشل ويلفيئر کاتي عمرڪوٽ ۾ ڊپٽي ڊائريڪٽر طور مقرر هو ۽ پنهنجي گهر ۾ هڪ نجي ٽيوشن سينٽر پڻ هلائيندو هو، وڊيو منظرعام تي اچڻ کان پوءِ لاڳاپيل اختيارين کيس معطل ڪندي ڊائريڪٽر جنرل آفيس ڪراچي ۾ رپورٽ ڪرڻ جو حڪم جاري ڪيو آهي، پوليس جو چوڻ آهي ته واقعي جي مختلف پهلوئن کان جاچ جاري آهي، جڏهن ته عدالت ۾ شاهدن ۽ جاچ رپورٽن جي روشني ۾ وڌيڪَ قانوني ڪارروائي ڪئي ويندي.