ملير: ڀينس ڪالوني جي سرڪاري اسڪول مان در، دريون ۽ فرنيچر چوري

چور اسڪول جا دروازا، دريون، فرنيچر، پکا ۽ ٻيو سامان گاڏي ۾ لوڊ ڪري کڻي ويا

ملير (رپورٽ: عبدالرشيد مورجھريو) ملير جي علائقي ڀينس ڪالوني روڊ نمبر 5 سُڪڻ ٿاڻي جي حدن ۾ قائم هڪ سرڪاري اسڪول مان نامعلوم چور اسڪول جي عمارت جو لڳ ڀڳ سمورو بنيادي سامان چوري ڪري فرار ٿي ويا.ان سلسلي ۾ ڊيري اينڊ ڪيٽل ايسوسيئيشن جي اڳواڻ عمر شاڪر اسڪول جو دورو ڪرائيندي ٻڌايو ته چورن اسڪول جا دروازا، دريون، ٻارن جا ڊيسڪ، ڪرسيون، بجلي جا پنکا ۽ ٻيو قيمتي سامان گاڏي ۾ لوڊ ڪري کڻي ويا. هن چيو ته چورن اسڪول جا ٻئي مکيه گيٽ به نه ڇڏيا. مقامي ماڻهن موجب مشڪوڪ سرگرمي ڏسڻ بعد هڪ گاڏي کي روڪي پوليس کي اطلاع ڏنو ويو، جنهن کانپوءِ معاملو منظرعام تي آيو واقعي تي علائقي ۾ سخت ڳڻتي ظاهر ڪئي وئي آهي ۽ ان کي تعليم دشمن عمل قرار ڏنو ويو آهي. مقامي رهواسين ۽ سماجي تنظيمن سنڌ حڪومت، وزير تعليم ۽ آءِ جي سنڌ کان مطالبو ڪيو آهي ته واقعي جو فوري نوٽيس وٺي شفاف جاچ ڪرائي وڃي، ذميوارن کي گرفتار ڪيو وڃي، چوري ٿيل سامان واپس آندو وڃي ۽ اسڪول جي بحالي سان گڏ مستقل سيڪيورٽي انتظام پڻ ڪيا وڃن. علائقي واسين جو چوڻ آهي ته هي واقعو رڳو چوري جو نه، پر ٻارن جي تعليم ۽ سندن مستقبل تي سڌو سنئون حملو آهي.