سجاول ۾ اي ڊي سي ون شاهد نظير لنڊ جي صدارت هيٺ اجلاس

اجلاس ۾ اسسٽنٽ ڪمشنرن، مختيارڪارن، اسسٽنٽ مختيارڪارن به شرڪت ڪئي

سجاول (رپورٽر) ڊپٽي ڪمشنر سجاول زاهد حسين رند جي هدايتن تي ايڊيشنل ڊپٽي ڪمشنر ون شاهد نظير لنڊ جي صدارت هيٺ ڊي سي ڪمپليڪس سجاول جي درٻار هال ۾ هڪ اهم اجلاس منعقد ٿيو، جنهن ۾ اسسٽنٽ ڪمشنرن، مختيارڪارن، اسسٽنٽ مختيارڪارن، سپروائزنگ تپيدارن، تپيدارن ۽ ٻين لاڳاپيل آفيسرن شرڪت ڪئي. اجلاس ۾ رڪارڊ آف رائٽس جي ازسرِنو لکت واري عمل بابت ٿيندڙ اڳڀرائي جو تفصيلي جائزو ورتو ويو.ان موقعي تي ايڊيشنل ڊپٽي ڪمشنر ون شاهد نظير لنڊ لاڳاپيل آفيسرن کي هدايت ڪئي ته رڪارڊ جي درستگي، شفافيت ۽ وقت سر تڪميل کي يقيني بڻايو وڃي، جيئن سرڪاري زمينن ۽ ملڪيتن جو مڪمل ۽ مستند رڪارڊ محفوظ بڻائي سگهجي. اجلاس ۾ مختلف مرحلن تي جاري ڪم، پيش ايندڙ مسئلن ۽ انهن جي حل لاءِ تجويزن تي پڻ غور ويچار ڪيو ويو.لاڳاپيل آفيسرن ايڊيشنل ڊپٽي ڪمشنر ون کي جاري اڳڀرائي بابت آگاهه ڪندي خاطري ڪرائي ته مقرر ڪيل هدفن جي حاصلات لاءِ سمورا ضروري قدم کنيا پيا وڃن.ايڊيشنل ڊپٽي ڪمشنر ون زور ڀريو ته رڪارڊ جي ازسرِنو لکت وارو عمل مقرر وقت اندر مڪمل ڪيو وڃي، جيئن روينيو کاتي جي رڪارڊ کي وڌيڪ مؤثر، منظم ۽ قابلِ اعتماد بڻائي سگهجي.