ملير، موٽروي ايم-نائن تي ڊمپر پوليس موبائل مٿان چڙهي ويو،2 پوليس اهلڪار شهيد

ڊرائيور گرفتار، حادثي بابت وڌيڪ جاچ جاري

ملير (رپورٽ: عبدالرشيد مورجھريو) ڪراچي موٽروي ايم-نائن تي ڪاٺوڙ ويجهو پيش آيل خوفناڪ ٽريفڪ حادثي ۾ 2 پوليس اهلڪار شهيد ٿي ويا۔ حادثو ان وقت پيش آيو جڏهن نوري آباد کان ڪراچي طرف ايندڙ 22 ويلر ڊمپر تيز رفتاري سبب روڊ جي ڪناري بيٺل سرڪاري پوليس موبائل مٿان چڙهي ويو۔حادثي ۾ سب انسپيڪٽر صاحب خان ۽ ڊي پي سي واجد موقع تي ئي شهيد ٿي ويا، جڏهن ته پوليس اهلڪار پرورش محفوظ رهيو۔ اطلاع ملڻ شرط موٽروي پوليس جا سينيئر آفيسر ۽ ريسڪيو ٽيمون واقعي واري هنڌ پهچي ويون۔ترجمان موٽروي پوليس موجب صبح تقريباً 5:40 وڳي پوليس موبائل نمبر SPC-536 مين سپر هاءِ وي حيدرآباد کان ڪراچي روڊ چڪوال پمپ ڀرسان ڊيوٽي تي موجود هئي، جتي عملي ۾ سب انسپيڪٽر صاحب خان، اهلڪار پرورش ۽ ڊي پي سي واجد شامل هئا۔ ڊيوٽي دوران ئي ٽرڪ نمبر TMJ-944 پوليس موبائل کي ٽڪر هڻي مٿان چڙهي ويو۔ريسڪيو آپريشن دوران هڪ اهلڪار جو لاش فوري طور ڪڍيو ويو، جڏهن ته ٻئي اهلڪار کي ڪڍڻ لاءِ آپريشن جاري رهيو۔ بعد ۾ ٻنهي شهيد اهلڪارن جا لاش عباسي شهيد اسپتال منتقل ڪيا ويا۔پوليس موجب ڊمپر ڊرائيور شهاب الدين ولد ياسين خان کي گرفتار ڪيو ويو آهي، جنهن ابتدائي بيان ۾ ٻڌايو ته ڊرائيونگ دوران کيس ننڊ اچي وئي هئي، جنهن سبب حادثو پيش آيو۔واقعي بعد ايس ايس پي ملير به موقعي تي پهچي ويو، جڏهن ته ڊمپر کي هٽائڻ لاءِ لفٽر طلب ڪيو ويو آهي۔ پوليس واقعي جو ڪيس داخل ڪري وڌيڪ جاچ شروع ڪري ڇڏي آهي۔