عمرڪوٽ ۾ پاڪ فوج سان يڪجهتي جي اظهار لاءِ ريلي

جناح پارڪ کان پريس ڪلب تائين منظم ريلي ڪڍي وئي

عمرڪوٽ (رپورٽ:ڪانجي مل رکيسر) عمرڪوٽ ۾ اين پي سي آءِ ايڇ اي پاڪستان مدر ونگ پاران پاڪ فوج جي حق ۾ اظهارِ يڪجهتي لاءِ جناح پارڪ کان پريس ڪلب عمرڪوٽ تائين هڪ ڀرپور ۽ منظم ريلي ڪڍي وئي، ريلي ۾ شهرين وڏي تعداد ۾ شرڪت ڪري قومي جذبي جو مظاهرو ڪيو ۽ هٿن ۾ قومي پرچم ۽ بينرز کنيل هئا، ريلي جي قيادت فقير عبدالله ڀنبڀرو، سينيئر وائيس چيئرمين صوبه سنڌ، ۽ حاجي مبارڪ منگريو صدر ڊويزنل ميرپورخاص ڪئي، جڏهن ته حبيب الله قمبراڻي، همتٿارام ڀيل، والجِي رام ڀيل، محمد شريف بجير، امام علي بجير، منٺار ڀيل ۽ ارجن ڀيل سميت ٻيا اڳواڻ ۽ ڪارڪن پڻ شرڪت ڪئي، شرڪت ڪندڙن پاڪ فوج زنده باد ۽ پاڪستان پائندہ باد جا فلڪ شگاف نعرهَ بلند ڪيا، مقررين چيو ته پاڪ فوج ملڪ جي سرحدن جي تحفظ، قومي سلامتي ۽ استحڪام جي ضامن آهي ۽ ان جي قربانين کي قوم هميشه ياد رکندي، انهن چيو ته پاڪستاني عوام هر ڏکي وقت ۾ پنهنجي بهادر فوج سان گڏ بيٺل آهي ۽ ملڪ جي دفاع لاءِ هر قرباني ڏيڻ لاءِ تيار آهي، ان موقعي تي عالمي سطح تي پيدا ٿيل تڪرار تي به ڳڻتي جو اظهار ڪيو ويو، مقررين آمريڪا ۽ اسرائيل پاران ايران تي حملن جي مذمت ڪئي ۽ ايراني سپريم ليڊر آيت الله خامنه جي شهادت تي گهري ڏک ۽ افسوس جو اظهار ڪيو، انهن عالمي برادري کان مطالبو ڪيو ته هو خطي ۾ وڌندڙ تڪرار کي گهٽائڻ ۽ امن و استحڪام قائم ڪرڻ ۾ مؤثر ڪردار ادا ڪن، ريلي جي پڄاڻي تي ملڪ جي سلامتي، ترقي، استحڪام ۽ عالم اسلام ۾ امن لاءِ خصوصي دعا پڻ ڪئي وئي.