ايران تي حملن ۽ آيت الله خامنا اي جي شهادت خلاف عمرڪوٽ ۾ ريلي ۽ ڌرڻو

هزارين ماڻهن پاران ريلي ڪڍي الله والا چوڪ تي ڌرڻو هنيو ويو، ڪاروبار مڪمل طور بند

عمرڪوٽ (رپورٽ:ڪانجي مل رکيسر) عمرڪوٽ ۾ ايران جي سپريم ليڊر آیت اللہ خامنہ اي جي مبينا شهادت جي خبر تي سخت ردِعمل سامهون آيو، جتي مختلف مذهبي ۽ سياسي جماعتن جي اڳواڻن ۽ شهرين احتجاجي مظاهرو ڪندي الله والا چوڪ تي ڌرڻو هنيو ۽ مک روڊ کي ٽرئفڪ لاءِ بند ڪري ڇڏيو، احتجاج دوران “آمريڪا مرده باد” ۽ “اسرائيل مرده باد” جا بلند بانگ نعرا هنيا ويا، جنهن سان فضا سوڳوار ۽ جذباتي منظر پيش ڪندي رهي، مظاهرَي جي اڳواڻي علامه ارشاد علي عرفاني، سيد عباس شاهه ۽ زمان کوسو ڪئي، مقررين خطاب ڪندي عالمي برادري کان مطالبو ڪيو ته هو هن واقعي جو فوري نوٽيس وٺي ۽ خطي ۾ وڌندڙ ڇڪتاڻ کي روڪڻ لاءِ مؤثر ڪردار ادا ڪري، احتجاج ڪندڙن ٽائر ساڙي روڊ بلاڪ ڪري ڇڏيو، جنهن سبب ٽرئفڪ مڪمل طور معطل رهي، جڏهن ته پوليس جي نفري به موقعي تي موجود رهي، شهر جا اهم واپاري مرڪز شاهی بازار، ٿر بازار، شيو رام مارڪيٽ، موتي چوڪ، روحل بس اسٽاپ ۽ عائشه مارڪيٽ مڪمل طور بند رهيا، واپاري برادري به احتجاج سان يڪجهتي طور پنهنجون دڪان بند رکيون، احتجاجي ڪئمپ پريس ڪلب عمرڪوٽ سامهون قائم ڪيو ويو، جتي مختلف سياسي ۽ سماجي اڳواڻ پهچي تعزيت ۽ يڪجهتي جو اظهار ڪيو، پاڪستان پيپلز پارٽي جي اڳواڻ برهان الدين ڪنڀر پنهنجي خطاب ۾ آمريڪا ۽ اسرائيل جي پاليسين تي سخت تنقيد ڪئي، ڪنور ڪرني سنگهه به ڌرڻي ۾ شريڪ ٿيو ۽ سخت لفظن ۾ مذمت ڪندي شهيد لاءِ خراجِ عقيدت پيش ڪيو، اڳوڻي پي ٽي آءِ ايم ايم اي لال مالهي اهم اعلان ڪندي هندو برادري کي اپيل ڪئي ته موجوده صورتحال نظر ۾ رکندي هولي جون تقريبون ملتوي ڪيون وڃن، هن چيو ته اسان پنهنجن ڀائرن جي ڏک ۾ برابر جا شريڪ آهيون ۽ بين المذاهب هم آهنگي اسان جي سڃاڻپ آهي، جمعيت علماءِ اسلام ضلع عمرڪوٽ جي پريس سيڪريٽري رسول بخش منگريو ۽ ميڊيا ڪوآرڊينيٽر عمران علي ديوبندي به احتجاجي ڪئمپ ۾ پهتا ۽ شيعه علماءِ ڪونسل جي اڳواڻن سان ملاقات ڪري گڏيل جدوجهد جاري رکڻ جو عزم ورجايو، علامه ارشاد علي عرفاني ڪراچي سميت ٻين شهرن ۾ مبينا پوليس ڪاررواين جي به مذمت ڪئي، احتجاج ڪندڙن عالمي ادارن کان مطالبو ڪيو ته خطي ۾ امن ۽ استحڪام لاءِ فوري قدم کنيا وڃن ۽ ذميوارن خلاف ڪارروائي کي يقيني بڻايو وڃي، شهر ۾ صورتحال بدستور ڇڪتاڻ واري پر پُرامن رهي، جڏهن ته انتظاميا امن امان برقرار رکڻ لاءِ نگراني جاري رکي.