ڪورنگي فش هاربر روڊ تي مبينا ون ويلنگ تان جهيڙو، هڪ ڄڻي جي اک ضايع، ڪيترائي زخمي

ملير (رپورٽ: عبدالرشيد مورجھريو) ڪورنگي فش هاربر روڊ يوسي نائين چشمہ ۾ هر جمعي، ڇنڇر ۽ آچر تي مختلف علائقن مان ايندڙ اوباش نوجوانن طرفان ون ويلنگ ۽ خطرناڪ ريسنگ جو سلسلو رڪجي نه سگهيو جنهن سبب علائقي واسين جي زندگي عذاب بڻجي وئي آهي۔ رهواسين موجب انهن حادثن سبب هينئر تائين لڳ ڀڳ اٺ کان ڏهه ماڻهو فوت ٿي چڪا آهن جڏهن ته ڪيترائي زخمي پڻ ٿي چڪا آهن۔علائقي واسين موجب فوت ٿيلن ۾ هڪ معصوم ٻار سميت خاصخيلي برادري جا ٻه ماڻهو پڻ شامل آهن، جڏهن ته ڪيترائي ماڻهو مختلف حادثن ۾ سخت زخمي ٿيا آهن۔ رهواسين جو چوڻ آهي ته هن صورتحال بابت ڪيترائي ڀيرا ايم اين اي، ايم پي اي، ابراهيم حيدري ٽائون انتظاميا، يوسي نائين چشمہ خاصخيلي، ايس ايڇ او ابراهيم حيدري ۽ ڪورنگي فشريز انتظاميا کي آگاهه ڪيو ويو، پر ڪنهن به موثر قدم نه کنيو۔مسلسل حادثن ۽ جاني نقصان کانپوءِ جمعي ڏينهن علائقي واسين پنهنجي مدد پاڻ تحت پرامن احتجاج ڪندي ڪورنگي فش هاربر روڊ بند ڪري ڇڏيو۔ ڪجهه دير بعد وڏي انگ ۾ ون ويلنگ ڪندڙ نوجوان اتي پهتا ۽ زبردستي روڊ کولرائڻ جي ڪوشش ڪندي علائقي واسين تي حملو ڪري ڇڏيو۔رهواسين موجب حمله آورن سخت پٿراءُ ڪيو جنهن جي نتيجي ۾ گهرن اندر موجود عورتون ۽ ٻار زخمي ٿي پيا، جڏهن ته هڪ شخص جي اک مڪمل طور ضايع ٿي وئي۔ واقعي جي اطلاع تي علائقي واسي وڏي انگ ۾ پهتا ته حمله آور فرار ٿي ويا ۽ بعد ۾ ڪوسٽ گارڊ چوڪي ريڙهي روڊ ڀرسان گڏ ٿيا۔ذريعن موجب مشتعل ماڻهن ريڙهي ۽ ابراهيم حيدري ويندڙ گاڏين سميت هڪ مريض کڻي ويندڙ ايمبولينس تي به ڀڃ ڊاهه ڪئي، جنهن سبب گاڏين کي سخت نقصان پهتو۔علائقي واسين جو چوڻ آهي ته هنن ڪيترائي ڀيرا ڪورنگي فش هاربر انتظاميا کان وڌيڪ اسيڊ بريڪر لڳائڻ جو مطالبو ڪيو ته جيئن حادثن کي روڪي سگهجي، پر سندن مطالبن کي نظرانداز ڪيو ويو آهي۔مظاهرين خبردار ڪيو آهي ته جيڪڏهن فوري طور اسيڊ بريڪر نه لڳايا ويا ته علائقي واسي پنهنجي مدد پاڻ تحت روڊ ٽوڙي اسيڊ بريڪر ٺاهيندا، جنهن سان ٿيندڙ ڪنهن به نقصان جي ذميواري ڪورنگي فش هاربر انتظاميا ۽ لاڳاپيل اختيارين تي هوندي۔ علائقي واسين اعليٰ اختيارين کان فوري نوٽيس وٺندي ون ويلنگ ڪندڙن خلاف سخت ڪارروائي، مستقل پوليس نفري مقرر ڪرڻ ۽ اسيڊ بريڪرز جي فوري تنصيب جو مطالبو ڪيو آهي۔