ابراهيم حيدري جي ميونسپل چيئرمين جي اڳواڻي ۾ يوم تشڪر ريلي ڪڍي وئي

ريلي رزاق آباد کان ٽائون آفيس تائين ڪڍي وئي، ٽائون آفيسرن، ميمبرن، ملازمن ۽ شهرين جي شرڪت

ملير (رپورٽ: عبدالرشيد مورجھريو) ابراهيم حيدري ٽائون ميونسپل ڪارپوريشن جي چيئرمين نظير احمد ڀٽو جي اڳواڻي ۾ يومِ تشڪر ۽ اظهارِ يڪجهتي ريلي رزاق آباد کان ٽائون آفيس تائين ڪڍي وئي جنهن ۾ ٽائون آفيسرن، ٽائون ميمبرن، ملازمن ۽ شهرين وڏي انگ ۾ شرڪت ڪئي. ريلي جي شرڪت ڪندڙن قومي جهنڊا کڻي “پاڪستان زنده باد” ۽ “پاڪ فوج زنده باد” جا نعرا هنيا جڏهن ته ملڪ جي سلامتي، ترقي ۽ استحڪام لاءِ خصوصي دعائون پڻ ڪيون ويون. ان موقعي تي ٽائون چيئرمين نظير احمد ڀٽو خطاب ڪندي چيو ته وزيراعظم پاڪستان شهباز شريف ۽ فيلڊ مارشل حافظ عاصم منير جي بهترين قيادت ۽ موثر سفارتڪاري سبب پاڪستان جو مثبت ڪردار عالمي سطح تي نمايان ٿيو آهي. هن چيو ته پاڪستان هڪ ذميوار رياست طور ثالثي جو اهم ڪردار ادا ڪندي علائقي ۾ امن قائم ڪرڻ لاءِ اهم اڳڀرائي ڪئي آهي. هن وڌيڪ چيو ته پاڪستان پيپلز پارٽي جي قيادت، خاص طور چيئرمين بلاول ڀٽو زرداري، هميشه قومي مفاد، جمهوريت جي استحڪام ۽ عوامي خدمت لاءِ پنهنجو ڀرپور ڪردار ادا ڪيو آهي. ڏکين حالتن ۾ به پارٽي قيادت ملڪ ۽ قوم سان گڏ بيهڻ جي روايت برقرار رکي آهي ۽ قومي يڪجهتي کي فروغ ڏنو آهي. نظير احمد ڀٽو چيو ته يومِ تشڪر ملهائڻ جو مقصد قومي يڪجهتي کي هٿي ڏيڻ ۽ پنهنجي قيادت ۽ فوج سان مڪمل اظهارِ يڪجهتي ڪرڻ آهي قوم ۾ اتحاد، هم آهنگي ۽ حب الوطني جي جذبي کي مضبوط ڪري ٿو. نظير احمد ڀٽو پاڪ فوج کي خراجِ تحسين پيش ڪندي چيو ته پاڪ فوج، پاڪ بحريه ۽ پاڪ فضائيه ملڪ جي سلامتي ۽ خودمختياري جون ضامن آهن، پاڪ فوج دهشتگردي خلاف جنگ، سرحدن جي حفاظت ۽ قدرتي آفتن دوران عوام جي خدمت ۾ هميشه اهم ڪردار ادا ڪيو آهي اسان کي پنهنجي بهادر پاڪ فوج تي فخر آهي، ريلي جي پڄاڻي تي پاڪستان جي سلامتي، خوشحالي ۽ ترقي لاءِ گڏيل دعا ڪئي وئي. ان موقعي تي ميونسپل ڪمشنر مسرور نواز خشڪ، ڊائريڪٽر انفارميشن، ڊائريڪٽر ايڇ آر، ڊائريڪٽر سينيٽيشَن سميت ٻين آفيسرن، ٽائون ميمبرن، سياسي ۽ سماجي اڳواڻن ۽ شهرين وڏي انگ ۾ شرڪت ڪئي.