ابراهيم حيدري ۾ ڊيزل جي اگهن ۾ واڌ خلاف مهاڻن جي ريلي، فاطمه مجيد ۽ ٻين جي به شرڪت

ملير(رپورٽ: عبدالرشيد مورجھريو) ابراهيم حيدري ۾ ڊيزل جي وڌندڙ اگهن خلاف پاڪستان فشرفوڪ فورم طرفان احتجاجي ريلي ڪڍي ويئي جنهن ۾ وڏي انگ ۾ مهاڻن شرڪت ڪئي۔احتجاج ۾ فاطمه مجيد، پاڪستان فشر فوڪ فورم جي نمائندن ۽ ٻين مهاڻن ڀرپور شرڪت ڪئي۔ شرڪت ڪندڙن مهانگي خلاف نعرا هنيا ۽ حڪومت کان فوري رليف جو مطالبو ڪيو۔ان موقعي تي فاطمه مجيد خطاب ڪندي چيو ته ڊيزل جي لڳاتار وڌندڙ اگهن سبب مهاڻن جو روزگار سخت خطري ۾ پئجي ويو آهي، تنهنڪري حڪومت فوري طور تي ايندھن جي قيمتن ۾ گهٽتائي ڪري مهاڻن کي رليف فراهم ڪري۔هن وڌيڪ چيو ته جيڪڏهن مهانگائي ۽ ڊيزل جي اگهن ۾ واڌ جاري رهي ته مهاڻن جي معاشي حالت وڌيڪ خراب ٿي سگهي ٿي۔مظاهري ۾ شامل مجيد موٽاڻي، ايوب شان، طالب ڪڇي ۽ ٻين اڳواڻن پڻ خطاب ڪندي مطالبو ڪيو ته مهانگي ايندھن سبب متاثر ٿيل مهاڻن لاءِ فوري طور خصوصي رليف پيڪيج جو اعلان ڪيو وڃي۔مظاهرين خبردار ڪيو ته جيڪڏهن مطالبا منظور نه ڪيا ويا ته احتجاج جو دائرو وڌيڪ وسيع ڪيو ويندو۔