پڊعيدن جي ڳوٺ چيهي واسي نوجوان جي بازيابي لاءِ نوشھروفيروز ۾ احتجاج

شاهد سولنگي گذريل ڏينھن کان گم آھي، خدشو آھي تھ کيس اغوا ڪيو ويو آھي، نوٽيس ورتو وڃي: وارث

نوشهرو فيروز (ڊر)پڊعيدن ڀرسان ڳوٺ چيهي جي رهواسين جو اغوا ٿيل نوجوان جي بازيابي لاءِ نوشهرو فيروز پريس ڪلب اڳيان احتجاجي مظاهرو ڪيو. احتجاج جي اڳواڻي مسمات حاڪم زادي سولنگي راشد علي سولنگي، عاشق علي سولنگي، وقار علي سولنگي، مجاهد علي سولنگي ۽ ٻيا ڪري رهيا هئا. ان موقعي تي احتجاج ڪندڙن صحافين سان ڳالهائيندي چيو ته سندن نوجوان شاهد علي سولنگي گذريل ڏينهن ڊي ايس پي نوشهرو فيروز وٽ هڪ انڪوائري جي سلسلي ۾ آيو هو، جتان واپسي بعد هو گهر نه پهتو ۽ ان کان پوءِ لاپتا آهي. هنن چيو ته کين شڪ آهي ته ٺاروشاه جي رهواسين ممتاز علي سولنگي، علي خان سولنگي، خالد سولنگي، گل بهار سولنگي، خدابخش، خادم سولنگي ۽ قدير سولنگي سندن نوجوان کي اغوا ڪيو آهي. هنن ٻڌايو ته واقعي بابت لاڳاپيل ٿاڻي تي اين سي داخل ڪرائي آهي، پر پوليس ڄاڻايل جوابدارن جي گرفتاري لاءِ ڪا به ڪارروائي نٿي ڪري. هنن ايس ايس پي نوشهرو فيروز مير روحل کوسو ۽ ٻين اعليٰ اختيارين کان مطالبو ڪيو ته جوابدارن کي فوري طور گرفتار ڪري شاهد علي سولنگي کي بازياب ڪرايو وڃي، ٻي صورت ۾ احتجاج جو دائرو وڌيڪ وسيع ڪيو ويندو.