سنڌ ۾ لکين خاندان غربت جي لڪير کان ھيٺ ھليا ويا آھن: اياز لطيف پليجو

حڪومت جون معاشي پاليسيون عوام دوست ناھن. محنت ڪش طبقو ڏينھون ڏينھن پوئتي وڃي رھيو آھي

حيدرآباد (بيورو) قومي عوامي تحريڪ جي سربراھ اياز لطيف پليجي چيو آھي تہ سنڌ ۾ لکين خاندان غربت جي لڪير کان ھيٺ ھليا ويا آھن. حڪومت جون معاشي پاليسيون عوام دوست ناھن. محنت ڪش طبقو ڏينھون ڏينھن پوئتي وڃي رھيو آھي. تعليم، صحت، روينيو سميت ھر کاتي کي ڦرلٽ جو مرڪز بنايو ويو آھي. اياز لطيف پليجي چيو تہ ڊيزل ۽ پئٽرول جون قيمتون وڌڻ سان ٽرانسپورٽ مھانگي ٿي وئي آھي. سفر مشڪل ٿي ويو آھي. ٽرانسپورٽ ذريعي پھچندڙ ھر شئي مھانگي ۽ خريد کان مٿي ٿي وئي آھي. اياز لطيف پليجي چيو تہ وفاق ۽ صوبائي حڪومت روزانو عوام سان ڪوڙ ڳالھائي تي. عوام کي گمراھ ڪري ان کي ٽيڪسن جي بار ھيٺ لتاڙيو پيو وڃي. اياز لطيف پليجي چيو تہ بجلي ناھي، گئس ناھي، ماڻھو پيئڻ جي صاف پاڻي سميت بنيادي انساني سھولت. ۽ ضرورتن کان محروم آھن. اياز لطيف پليجي چيو تہ پاڪستان زرعي ملڪ ھجڻ باوجود حڪومتي نااھلي جي ڪري کاڌي پيتي جون شيون ھاري، مزدور ۽ غريب ماڻھن جي پھچ کان مھانگيون ٿي ويون آھن. منافعي خور واپاري مافيا ڪڏھن کنڊ، ڪڏھن ڪڻڪ تہ ڪڏھن ڪنھن شئي جو ھٿرادو بحران ڪري عوام کي لٽين ٿا. اياز لطيف پليجي چيو تہ جن ملڪن ۾ جنگ ھلي رھي آھي، اتي جو عوام به ايترو پريشان ناھي جيتري تڪليف سنڌ ۽ پاڪستان ۾ عوام کي آھي. اياز لطيف پليجي چيو تہ بيڊ گورننس جي ڪري روزانو نوان نوان بحران جنم وٺن ٿا. حڪمران طبقو سمورن ٽيڪسن کان آجو آھي. وزيرن ۽ ڪامورن لاءِ گاڏيون مفت، پيٽرول مفت، ڊيزل مفت، بجلي مفت، جڳهون مفت، علاج مفت، انھن جي اولاد کي تعليم مفت، ھوائي سفر مفت آھن. ان سان گڏ ڪروڙين روپين جي ڪرپشن آھي، جنھنڪري جيڪو حڪومت ۽ انتظاميہ جو حصو ٿئي ٿو اھو ٿوري عرصي ۾ ارب پتي ٿيو وڃي. اياز لطيف پليجي چيو تہ ڪرپشن کي روڪيو وڃي ته مسئلا حل ٿي ويندا. عوام کي بنيادي سهولتون حاصل ٿي سگھنديون. اياز لطيف پليجي چيو تہ زرعي تباھي جي ڪري بي روزگاري ۽ بدحالي وڌي وئي آھي، جنھن جا ذميوار حڪمران آھن.