ملير: چشما ڳوٺ جو پرائمري اسڪول برساتي پاڻي جي گهيري هيٺ

برساتي پاڻي اسڪول جي اڱڻ، ڪلاس رومز جي چوڌاري ۽ رستي تي به تلاءَ جي شڪل ۾ بيٺل

ملير (رپورٽ: عبدالرشيد مورجھريو) ضلعي ملير جي علائقي چشمہ ڳوٺ ۾ واقع گورنمينٽ پرائمري اسڪول واڳون ڏر تازين برساتن کانپوءِ برساتي پاڻي ۾ ٻڏي ويو آهي، جنهن سبب شاگردن جي تعليم سخت متاثر ٿيڻ جو خدشو پيدا ٿي ويو آهي۔علائقي واسين موجب برسات کانپوءِ پاڻي جي نيڪالِ جو مناسب انتظام نه هجڻ سبب اسڪول جي اندر ۽ ڀرپاسي ۾ پاڻي بيهي ويو آهي۔ بيٺل بيهڻ سبب اسڪول جو اڱڻ ، ڪلاس رومز جي چوڌاري ۽ داخلا جو رستو مڪمل طور متاثر ٿي چڪو آهي، جنهن ڪري ٻارن ۽ استادن کي اسڪول اچڻ ۾ سخت مشڪلاتن کي منهن ڏيڻو پئجي رهيو آهي۔مقامي ماڻهن جو چوڻ آهي ته پاڻي بيهڻ سبب مڇرن جي افزائش ۾ اضافو ٿي رهيو آهي، جنهن ڪري شاگردن ۾ بيمارين پکڙجڻ جو خدشو پڻ وڌي ويو آهي۔ والدين ڳڻتي جو اظهار ڪندي چيو ته اهڙي صورتحال ۾ ٻارن کي اسڪول موڪلڻ خطري کان خالي ناهي۔ علائقي واسين الزام لڳايو ته لاڳاپيل بلدياتي ادارن ۽ تعليم سان لاڳاپيل اختيارين کي ڪيترائي ڀيرا آگاهه ڪيو ويو آهي، پر اڃا تائين ڪو به عملي قدم نه کنيو ويو آهي۔ شهرين ۽ والدين ضلعي انتظاميا، تعليم کاتي ۽ بلدياتي ادارن کان فوري نوٽيس وٺڻ، گندو پاڻي نيڪالِ جو بندوبست ڪرڻ ۽ اسڪول کي جلد کان جلد پاڻي مان خالي ڪرائڻ جو مطالبو ڪيو آهي ته جيئن تعليمي سرگرميون بحال ٿي سگهن۔