پپري ۾ لينڊ گريبرن، ڀتاخورن ۽ فراڊين خلاف پپري عوامي اتحاد جو قيام

پپري عوامي اتحاد جي سڏ تي 11 اپريل تي 2 وڳي فٽبال گرائونڊ کان ريلي ڪڍي ويندي: فيصلو

ملير (رپورٽ: عبدالرشيد مورجھريو) پپري ۾ وڌندڙ لينڊ گريبنگ، ڀتاخوري، غنڊه گردي ۽ غريب ماڻهن سان ٿيندڙ فراڊن خلاف انجمن تاجران پپري جي ميزباني هيٺ اهم گڏجاڻي منعقد ڪئي وئي، جنهن ۾ علائقي جي سياسي، سماجي، مذهبي اڳواڻن، اسٽيٽ يونين، ڪاروباري شخصيتن ۽ معزز شهرين وڏي تعداد ۾ شرڪت ڪئي۔گڏجاڻي دوران شرڪت ڪندڙن پپري ۾ وڌندڙ قبضاگيري، ڀتاخوري، غنڊه گردي ۽ فراڊ جي واقعن تي سخت ڳڻتي جو اظهار ڪندي اهڙن عوام دشمن عملن جي سخت لفظن ۾ مذمت ڪئي۔شرڪت ڪندڙن گڏيل صلاح سان بدمعاشن، غنڊن، لينڊ گريبرن ۽ فراڊين خلاف قانوني ۽ احتجاجي رستو اختيار ڪرڻ جو فيصلو ڪيو، جڏهن ته علائقي ۾ امن امان بحال ڪرائڻ لاءِ "پپري عوامي اتحاد" جي نالي سان نئين تنظيم جو بنياد رکيو ويو۔فيصلي موجب نئين تنظيم تحت پوليس جي اعليٰ عملدارن سان ملاقاتون ڪيون وينديون ۽ قانوني طريقي سان ڏوهارين خلاف ڪارروائي لاءِ قدم کنيا ويندا۔ گڏجاڻي ۾ عوام کي قبضاگيرن ۽ فراڊين کان هوشيار ڪرڻ جو پڻ عزم ظاهر ڪيو ويو۔ ان موقعي تي اعلان ڪيو ويو ته پپري عوامي اتحاد جي سڏ تي 11 اپريل بروز ڇنڇر منجهند جو 2 وڳي فٽبال گرائونڊ کان احتجاجي ريلي ڪڍي ويندي، جنهن ۾ علائقي جي شهرين کي وڏي انگ ۾ شرڪت جي اپيل ڪئي وئي آهي۔